Almatyda Á.Bókeıhanovtyń 150 jyldyǵyna arnalǵan olımpıadanyń jeńimpazdary anyqtaldy (FOTO)
Oǵan Qyzdar ýnıversıtetiniń «Bolashaq» toby, ál-Farabı atyndaǵy QazUÝ-dyń «Alash Orda» toby, S.Asfendııarov atyndaǵy QazUMÝ-dyń «Uly dala» toby, Turan ýnıversıtetiniń «Turan» toby, Almaty tehnologııalyq ýnıversıtetiniń «Aıbyndy Alash urpaǵy» toby jáne Almaty ýnıversıtetiniń «Jeruıyq» toby qatysty.
Dástúrge aınalǵan sharany Qyzdar ýnıversıtetiniń birinshi prorektory Bahodır Álıev saltanatty túrde ashyp, qatysýshylarǵa sáttilik tiledi.
«Olımpıadany uıymdastyrýdaǵy basty maqsat - stýdentterdiń boıyna óz eline degen maqtanysh pen patrıottyq sezimdi uıalatý. Álıhan Bókeıhanulynyń tulǵasy men Alash qozǵalysyn aıshyqtaı otyryp, Táýelsizdigimizdiń 25 jyldyq tarıhynyń mańyzdylyǵyn túsindirý jáne jastardy ultjandy azamat bolýǵa tárbıeleý», - dedi B. Álıev.
Stýdentter ıntellektýaldy olımpıadada bes baǵyt: «Tanystyrý», «Uıashyqtar qupııasy», «Beıne suraq», «Altyn qaqpa» jáne «Oı tolǵaý» arqyly bilimderin sarapqa saldy.
«Birinshi saıysta ózderin tanystyryp ótken komandalar, ekinshi kezeńde «Memlekettik basqarý», «Qazirgi álemdegi Qazaqstan», «Alash qozǵalysy», «Kemeńger tulǵalardyń ómiri men qyzmeti» degen taqyryptarǵa arnalǵan suraqtar boıynsha baq synasty.
«Beıne suraq» dep atalatyn úshinshi kezeńde Alash qaıratkerleriniń qoǵamdyq-saıası qyzmeti, Alash partııasy men Alash Orda úkimetiniń qurylý tarıhy, el rámizderi men qazaq tarıhyna baılanysty beınesaýaldarǵa jaýap berdi.
«Altyn qaqpa» saıysynda Prezıdent, Úkimet, avtonomııa, demokratııa, quqyq, ult, mádenıet jáne taǵy basqa da sózderdiń mán-maǵynasyn qazaq jáne aǵylshyn tilderinde túsindirip synǵa tússe, «Oı tolǵaý» saıysynda jáshikte jasyrynǵan zattardy tapty. Suraqtardyń deni Alash qaıratkerleriniń qoǵamdyq-saıası qyzmeti men Táýelsizdigimizdiń 25 jyldyq tarıhyna arnaldy, - dep habarlaıdy Qyzdar ýnıversıtetiniń baspasóz qyzmeti.
Qatysýshylardyń bilimderi men biliktilikterine Sh. Ýálıhanov atyndaǵy Tarıh jáne etnologııa ınstıtýty dırektorynyń orynbasary, tarıh ǵylymdarynyń doktory Svetlana Smaǵulova, Abaı atyndaǵy Qazaq Ulttyq pedagogıkalyq ýnıversıtetiniń professory, tarıh ǵylymdarynyń doktory Ádilhan Qudaıbergenov jáne Sh. Ýálıhanov atyndaǵy Tarıh jáne etnologııa ınstıtýtynyń PhD doktoranty Rysbek Omarbaev qazylyq etti.
Sonymen, Olımpıada qorytyndysy boıynsha 1-shi oryndy Turan ýnıversıtetiniń «Turan» toby jeńip aldy. Ekinshi orynǵa ál-Farabı atyndaǵy Qazaq Ulttyq ýnıversıtetiniń «Alash Orda» toby ıe boldy. Al S.Asfendııarov atyndaǵy QazUMÝ-dyń «Uly dala» toby men Qyzdar ýnıversıtetiniń «Bolashaq» toby úshinshi oryndy ózara bólisti.
Jeńimpazdardyń barlyǵy dıplomdar jáne arnaıy syılyqtarmen marapattaldy. Al, toptardy daıyndaǵyn jetekshilerge alǵys hattar tabys etildi.
Aıta ketelik, bıyl Alash qozǵalysynyń jetekshisi, qoǵam qaıratkeri, kósemsózshi Álıhan Bókeıhanovtyń týǵanyna 150 jyl tolyp otyr.
Búkilálemdik dara tulǵa retinde tanylǵan Alash qaıratkeriniń mereıtoıy ıÝNESKO kóleminde, ıaǵnı búkil álem boıynsha toılanatyn bolady.
Bul týraly ıÝNESKO-nyń 2015 jyly 18 qarashada Parıjde aıaqtalǵan Bas konferentsııasynyń 38-shi sessııasynda jarııa etilgenin esterińizge salamyz.
