Almatyda 95 jastaǵy qarııa koronavırýsty jeńip shyqty
ALMATY. QazAqparat - Almatydaǵy modýldi juqpaly aýrýlar aýrýhanasynda 95 jastaǵy qarııa COVID-19 vırýsynan emdelip shyqty, dep habarlaıdy QazAqparat tilshisi.
Patsıent túskende tekserý barysynda kompıýterlik tomografııa ókpeniń 70% zaqymdalǵanyn anyqtap, eki jaqty polısegmentarly pnevmonııa dıagnozy qoıyldy.
95 jastaǵy patsıentte kóptegen ilespe aýrýlary bolǵan. Atap aıtar bolsaq, júrektiń ıshemııalyq aýrýy, stenokardııa, arterııalyq gıpertenzııa, mı qan tamyrlarynyń jas patologııasy, qan aınalymynyń buzylýy jáne údemeli dıstsırkýlıatorlyq entsefalopatııa bolǵan.
Naýqas 18 kún boıy statsıonarda em aldy. Onyń ishinde 8 kún naýqasqa qosymsha respıratorlyq qoldaý kórsetildi.
«Sondaı-aq, taǵy bir nárseni aıta ketkim keledi - adamnyń aýrýdan jazylýy onyń ishki jaǵdaıyna, onyń ómir súrýge, otbasyna, jaqyndaryna oralýǵa degen nıetine de baılanysty. Bul - bizdiń statsıonarymyzdaǵy eń jasamys naýqas, ol koronavırýsty jeńdi», - deıdi dáriger-reanımatolog Baýyrjan Sársembaev.
Aqsaqal klınıkanyń barlyq medıtsına qyzmetkerlerine alǵys aıtyp, naǵyz batyrlar dep baǵa berdi. Aq halatty abzal jandarǵa baqyt, densaýlyq jáne osy pandemııamen kúresýde shydamdylyq tiledi.
Aıta ketý kerek, keshe balalar juqpaly aýrýhanasynda týǵanyna 10 kún bolǵan náresteniń emdelip shyqqanyn jazǵan bolatynbyz.
