Almatyda 93 jasqa qaraǵan shaǵynda kórnekti jańashyl-pedagog jáne qoǵam qaıratkeri Rafıqa Nurtazına dúnıeden ozdy
ALMATY. 3 sáýir. QazAqparat - Almatyda 93 jasqa qaraǵan shaǵynda kórnekti jańashyl-pedagog jáne qoǵam qaıratkeri Rafıqa Bekenqyzy Nurtazına dúnıeden ótti. Keshe ony qala jurtshylyǵy sońǵy saparǵa shyǵaryp saldy.
Ol shyn máninde ustazdardyń ustazy boldy. Rafıqa Bekenqyzy óziniń súıikti isine 60 jylǵa jýyq ómirin arnady, onyń shákirtteri ondaǵan myńnan asady. Búginde olar Qazaqstannyń túpkir-túpkirinde, odan da tysqary jerlerde eńbek etedi, olardyń arasynda tanmal adamdar az emes.
Onyń ustazdyq qyzmeti qalaı maqtaýǵa da sııady, degenmen de onyń eń eleýlisi - ózi orys tili men ádebıetiniń muǵalimi bola otyryp, Almatynyń qaq ortasynda birden-bir №12 qazaq mektebin ashýy boldy. 60-shy jyldardyń sońynda 70-shi jyldardyń basynda mundaı is-áreketke barý erlikke para-par qadam edi.
Rafıqa Bekenqyzy Nurtazına 1921 jyly 8 naýryzda Pavlodar oblysy, Pavlodar aýdany 6-aýylynda dúnıege keldi. Pedagog-ádistemeshi, ǵalym, Qazaq KSR-ine eńbek sińirgen muǵalim (1966), Sotsıalıstik Eńbek Eri (1968), pedagogıka ǵylymdarynyń kandıdaty (1974). Qazaqtyń memlekettik qyzdar pedagogıka ınstıtýtynyń fılologııa fakýltetin bitirgen (1951). 1951 - 71 jyldary Almatydaǵy №12 qazaq orta mektebinde orys tili men ádebıetiniń muǵalimi, oqý isiniń meńgerýshisi, 1971 jyldan sol mekteptiń dırektory boldy. 1972 jyly respýblıkalyq pedagogıkalyq qoǵam tóraıymy bolyp saılandy. Nurtazına - 40-tan astam ǵylymı ádistemelik eńbektiń (orys tilinde) avtory, ol qazaq mektepterindegi orys tili men ádebıetin oqytý baǵdarlamasyn ázirleýge qatysty. Lenın (1968), "Qurmet belgisi" (1966) ordenderimen, birneshe medaldarmen marapattalǵan.
