Almatyda 9299 mektep bitirýshi úlken ómirge qadam basty
ALMATY. QazAqparat – Almaty ákimi Baqytjan Saǵyntaev sońǵy qońyraýǵa qatysty pikir bildirdi, dep habarlaıdy QazAqparat tilshisi.
«Búgin mektep túlekteri úshin eń mańyzdy kún.
Almatyda 9299 mektep túlegi úlken ómirge qanat qaqty. Sonyń ishinde 545 túlek — «Altyn belgi» ıegeri, 714 oqýshy oqý ozaty atandy. Bıyl mektepterde sońǵy qońyraý alǵash ret onlaın túrde soǵyldy. Mektep dırektorlary men ustazdar bul kúnniń sán-saltanatyn kelistirip, sezindirý úshin qoldan kelgendi jasady. Qyrýar eńbek atqaryldy. Tórtinshi toqsanda sabaqtar qashyqtan ótti. Oqý protsesiniń úzilmeýi úshin jedel iske kiristik», - dedi ákim.
Qala basshysy onlaın oqytý ustazdar, ata-analar, oqýshylar úshin synaq bolǵanyn aıtty.
«Qurmetti ustazdar, oqýshylar jáne olardyń ata-analary! Biz qıyn sátti birlese eńsere bildik, synaqtan súrinbeı óttik. Tájirıbe jınaqtadyq. Bul — bolashaqtaǵy zaman synaǵyna laıyqty tótep berýimizge qajet tájirıbe. Bıylǵy túlekter mektepti onlaın támamdady. Qolaısyz jaǵdaıda da bilimge erekshe qushtarlyq tanyttyńyzdar. Balalarǵa qoldaý kórsetken ata-analarǵa myń alǵys. Óz mindetterin múltiksiz atqarǵan muǵalimderge rahmet.
Qurmetti túlekter! Ómirlerińizdiń jańa paraǵyn ashqaly tursyzdar. Bilim kókjıegin keńeıtýge múmkindik kóp. Qaı mamandyqty tańdasańyz da, sol mamandyqtyń bilgir mamany bolyp shyǵýǵa tyrysyńyzdar. Tabandylyq — arman men maqsatyńa aparar alǵashqy qadamyń. Oqýshynyń jetistigi — ustazdyń abyroıy, eńbeginiń nátıjesi. Aq jol!» - dedi ákim.
