Almatyda 90 kóppáterli úı múlik ıeleri birlestigine aýysty
ALMATY. QazAqparat – Almatyda PIK-ten múlik ıelerin biriktirýge nemese kóppáterli úıdiń jaı seriktestigine kóshý boıynsha jumystar júrgizilýde. Óńirlik kommýnıkatsııalar qyzmeti alańynda ótken onlaın brıfıng barysynda Almaty qalasy Turǵyn úı saıasaty basqarmasy basshysynyń orynbasary Meıirjan Otynshıev atalǵan tetiktiń qalaı engizilip jatqany týraly aıtyp berdi, habarlaıdy QazAqparat tilshisi.
Eske salaıyq, osy jyldyń basynan bastap «Turǵyn úı qatynastary týraly» QR Zańyna túzetýler kúshine endi. Qoldanystaǵy zańnamaǵa túzetýler 2020 jylǵy 7 qańtarda qoldanysqa engizildi, al zańǵa táýeldi aktiler aǵymdaǵy jylǵy naýryz-sáýirde bekitildi.
Almaty qalasynda 870-ke jýyq basqarý organdaryna (PIK, TPIK, PK, JShS, JK jáne t. b.) qyzmet kórsetetin 8,6 myń kóppáterli turǵyn úı ornalasqanyn eskere otyryp, qoldanystaǵy zańnamaǵa engizilgen ózgerister men tolyqtyrýlardy iske asyrý jónindegi jol kartasy qabyldandy, páterler men turǵyn emes úı-jaılar ıeleriniń jınalystaryn ótkizý kestesi bekitildi.
Alaıda, Qazaqstan Respýblıkasynyń aýmaǵynda tótenshe jaǵdaı engizilýine, sondaı-aq qala aýmaǵynda jappaı sharalardyń ótkizilýine tyıym salatyn shekteý sharalarynyń engizilýine baılanysty jınalystardy ótkizý ýaqytsha toqtatyldy.
«Karantındik shekteý sharalaryn jeńildetýdi engizý boıynsha qala aýdandarynyń ákimderi páter, turǵyn emes úı-jaılar ıeleriniń jınalystaryn ótkizý kestesiniń ózektiligin arttyrdy», — dedi M. Otynshıev.
Búgingi kúni mobıldi toptar 4,2 myń kóppáterli turǵyn úılerdi qamtýmen 1,5 myńǵa jýyq jınalys ótkizdi, 90 múlik ıeleri birlestigine tirkeldi jáne basqarýdyń jańa nysany retinde 168 qarapaıym seriktestik tańdaldy.
