Almatyda 9 jastaǵy qyzyn ólimshi etip sabaǵan kelinshek ustaldy
ALMATY. QazAqparat - Almaty polıtseıleri sheshesi aıamaı sabaǵan 9 jasar qyzdy arashalap qaldy, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, 27 jastaǵy kelinshek 4 synyp oqıtyn qyzyn kópten beri uryp-soǵyp kelgen.
Qyz balanyń taıaqtyń astynda qalǵanyn kórshi áıel habarlaǵan. Almaty qalasy ІІD Jergilikti polıtsııa qyzmetiniń ıývenaldy polıtsııa bólimi jetekshisi Leıla Álipbaevanyń aıtýynsha, kórshiden túsken habardan keıin tártip saqshylary mekenjaı boıynsha úıge barǵan.
«Úıde kelinshektiń ózi joq eken. Qyzyn syrtynan qamap ketken. Qutqarý qyzmetiniń mamandaryn shaqyryp, qulypty buzý týraly sheshim qabyldandy. Balanyń jaǵdaıy óte nashar bolýy múmkin, sondyqtan biz keshiktirmeý týraly sheshim qabyldadyq. Shyndyǵynda, qyz balany ábden uryp-soqqan. Jedel járdem qyzmeti onyń denesiniń kógergenin anyqtady. Dárigerler onyń qaýipsizdigi úshin dereý aýrýhanaǵa alyp ketti. Qazirgi ýaqytta oǵan: jábirlengen, mıy shaıqalyp, eti kógergen degen dıagnoz qoıylyp otyr», - dedi ol.
Polıtsııa qyzmetkerleri jalǵyzbasty kelinshektiń osydan birneshe aı buryn tártip saqshylarynyń nazaryna ilikkenin de jetkizdi. Balaǵa durys qaramaǵany úshin sol kezde QR Ákimshilik kodeksiniń 127-baby boıynsha jaýapqa tartylǵan. Sol ýaqytta polıtsııa tolyq emes otbasynyń jaǵdaıyn Almaly aýdany ákimi apparaty janyndaǵy kámelettik jasqa tolmaǵandardyń quqyqtaryn qorǵaý boıynsha qurylǵan komıssııanyń qaraýyna joldaǵan.
«Ol kezde qyzyna qol kótergeni dáleldenbegen bolatyn. Qyzyn uryp-soǵýdy jaqynda bastaǵan dep te aıta almaımyz. Komıssııa sol kezde áıelge psıholog dárigerge qaralýǵa keńes bergen. Endi ýaqyt ózi kórsetip otyrǵandaı, kelinshektiń oǵan jasalǵan eskertýden eshqandaı nátıje shyǵarmaǵanyn kórip otyrmyz. Qazirgi ýaqytta atalǵan qylmys boıynsha QR QK 140-babynyń 2-bólimi boıynsha sotqa deıingi tergeý amaldary bastaldy. T esimdi kelinshek QR qylmystyq protsesýaldyq kodeksiniń 128-baby boıynsha ýaqytsha tergeý ızolıatoryna qamaldy. Zańda kórsetilgen protsessýaldyq merzimde ol sotqa tapsyrylyp, aldaǵy ýaqytta onyń abaqtyǵa qamalý máselesi sheshiledi. Osy oraıda, der kezinde habarlaǵan kórshilerge alǵys bildiremiz. Aýrýhanadan jazylyp shyqqannan keıin qyzdyń aldaǵy ýaqyttaǵy taǵdyry talqylanatyn bolady. Biz áıeldi ata-ana quqynan aıyrý máselesin talap etemiz», - dedi L.Álipbaeva.
