Almatyda 9 myńnan astam PTR-testini zańsyz satqandar ustaldy
ALMATY. QazAqparat – Almatyda koronavırýstyń bar-joǵyn anyqtaıtyn PTR-testiniń 9 myńnan astam danasyn zańsyz satqandar ustaldy. QazAqparat bul týraly QR Qarjy mınıstrligi Qarjy monıtorıngi komıtetine silteme jasap habarlaıdy.
Atalmysh komıtettiń Almaty qalasy boıynsha Ekonomıkalyq tergeý departamentiniń qyzmetkerleri qalalyq Polıtsııa departamenti jáne MKD qyzmetkerlerimen birge 7 shilde kúni jedel-izdestirý sharalaryn ótkizip, koronavırýsqa PTR-testilerdi satqan adamdardy ustaǵan. Olarda kásipkerlik qyzmetpen aınalysýǵa ruqsat qujattary bolmaǵan.
«Ustalǵan tulǵalar jalpy somasy 32 900 000 teńgege 7000 PTR-testini zańsyz satpaq bolǵany anyqtaldy. Tekseris barysynda avtokólikten QHR óndirilgen taǵy 2225 PTR-testi anyqtalyp, tárkilendi.
Qazirgi tańda atalǵan fakti boıynsha QR QK-niń 214-baby 1-bóligine (zańsyz kásipkerlik) sáıkes sotqa deıingi tergeý isi qozǵaldy», - delingen aqparatta.
Aıta keteıik, QR Prezıdenti Qasym-Jomart Toqaevtyń tapsyrmasymen barlyq óńirde dári-dármekterdiń baǵasyn qymbattatý faktilerin anyqtaý boıynsha reıdter ótkizilýde.
