Almatyda 9 myń adam basqa emhanaǵa aýysqan

ALMATY. QazAqparat – Bıylǵy tirkeý naýqany kezinde 9 myń almatylyq emhana tańdaý quqyǵyn paıdalandy. Bul týraly búgin arnaıy brıfıng barysynda «Áleýmettik medıtsınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

Tileýhan Ábildaevtyń málimetinshe, tirkeý naýqanyna qatysqan azamattar sany byltyrǵy jylmen salystyrǵanda edáýir azaıǵan. Turǵyndar Egov elektrondy úkimet portalyn tıimdi paıdalanýda.

«Sońǵy jyldary turǵyndarǵa, medıtsına uıymdary arasynda aqparattyq-túsindirý jumystary kóp júrgizildi. Buǵan emhana aýystyrýshylar sanynyń kúrt tómendeýi dálel bolsa kerek. Mysaly, jaqyn mańdaǵy emhana arqyly úıge dáriger shaqyrtýǵa yńǵaıly. Oǵan qosa, qazir jedel bolmasa, 4 sanattaǵy shaqyrtýlardyń bárine jergilikti emhana brıgadalary qyzmet kórsetedi», - dedi fılıal dırektory Tileýhan Ábildaev.

Bıylǵy tirkeý naýqanyna Almaty qalasynan 77 medıtsına mekemesi qatysty. Onyń 38-i – jeke menshik klınıka. Bul jeke bıznestiń memlekettik tapsyrysty oryndaýǵa degen qulshynysynyń artyp otyrǵanyn bildiredi.

Esterińizge sala ketsek, tirkeý naýqany 15 qyrkúıekte bastalyp, 15 qarashada aıaqtalǵan bolatyn. Biraq tańdaý jasap úlgermegen azamattar emhanany kez kelgen ýaqytta aýystyrýyna bolady.

Atap aıtqanda, basqa jerge qonys aýdarǵanda, emhana qaıta uıymdastyrylǵanda nemese Medıtsınalyq saqtandyrý qorymen kelisimshartty buzǵan jaǵdaıda da basqa emhanaǵa tirkelýge bolady. Sonymen qatar, ár turǵynnyń emhanany jylyna bir ret erkin tańdaý quqyǵy bar.