Almatyda 9 mamyrǵa oraı birjolǵy áleýmettik tólem kimderge beriledi

ALMATY. QazAqparat – Óńirlik kommýnıkatsııalar qyzmetinde ótken brıfıngte Almaty qalalyq ardagerler keńesiniń tóraǵasy Serik Qurmanǵalıev Jeńis kúnine arnalǵan áleýmettik tólemder týraly aıtyp berdi, dep habarlaıdy QazAqparat tilshisi.

«Búginde Almatyda 56 ǵana soǵys ardageri qaldy. Olardy materıaldyq qamtamasyz etý úshin 1,5 mıllıon teńge kóleminde bir jolǵy tólem jasalady», - dedi Serik Qurmanǵalıev.

Sonymen qatar, ekinshi dúnıejúzilik soǵys ardagerlerine jáne basqa memleketter aýmaǵyndaǵy soǵys qımyldaryna qatysýshylarǵa jeńildikter boıynsha teńestirilgen ardagerlerge 50 myń teńge kóleminde birjolǵy áleýmettik kómek beriledi, al olardyń jalpy sany – 13 myń adam.

Ardagerler keńesiniń ókili ataýly mereke kúnderi qaladaǵy árbir maıdangerdi olardyń otbasyna baryp, qala basshylyǵy jeke quttyqtaıtynyn jetkizdi.

Buǵan deıin habarlaǵanymyzdaı, Almaty ákimi merekelik sharaǵa qatysa almaıtyn ardagerlerdiń árqaısysyna aýdan ákimderimen birge ózi baryp, Jeńis kúnimen jeke quttyqtaıtynyn aıtqan bolatyn.