Almatyda 9 aıda 94 qala turǵyny teris dinı aǵymnyń yqpalynan qutylǵan
ALMATY. QazAqparat - Almatyda 9 aıdyń ishinde 94 qala turǵyny destrýktıvti teris aǵymnyń yqpalynan qutylǵan. Bul týraly Almaty qalasy din isteri jónindegi basqarma basshysynyń orynbasary Erǵalı Kósheke baspasóz máslıhatynda, aıtty dep habarlaıdy QazAqparat.
Almatyda 2016 jyldan bastap aqparattyq túsindirý toby jumys isteıdi. Onyń quramynda din salasyndaǵy 41 bilikti maman kirgen. Olar: tarıhshylar, dintanýshylar, ıslamtanýshylar, zańger, fılosof, psıhologtar, jáne din sarapshylar.
«Ońaltý jumystary boıynsha bıylǵy 9 aıdyń ishinde 94 qala turǵyny destrýktıvti teris dinı aǵymnyń yqpalynan qutylyp, dástúrli ıslam dinine oraldy. Sondaı-aq, Almatyda 184 dinı birlestik, 115 dinı ǵımarat jumys isteıdi, sondaı-aq 64 mıssıoner tirkelgen»,- dedi Erǵalı Kósheke.
Onyń aıtýynsha, Almatyda búginde 4 dinı oqý orny jumys isteıdi. Olar: «Nur Múbarak» ýnıversıteti, Imamdardyń biliktiligin arttyrý ınstıtýty, «Ábý hanıfa» medresesi, Pravoslav shirkeýiniń Almaty dinı semınarııasy.
