Almatyda 84 jastaǵy keıýanany qaǵyp ketken avtokólik júrgizýshisi ustaldy
ALMATY. QazAqparat - Almatyda 8 maýsymda 84 jastaǵy keıýanany qaǵyp ketken avtokólik júrgizýshisi ustaldy. Bul týraly búgin Almaty qalalyq ІІD resmı ókili Saltanat Ázirbek habarlady.
«Ájeı qazir aýrýhanada jatyr. Shyqqan soń, alǵan dene jaraqatyna baılanysty sot-medıtsınalyq saraptama júrgiziledi. Al ony qaǵyp ketken, jolsyzben júre beretin avtokóliktiń júrgizýshisi ustaldy. Endi aldaǵy ýaqytta qajet bolyp jatsa basqa da saraptamalar júrgiziledi», - dedi S. Ázirbek.
Aıta ketelik, bul oqıǵa týraly 12 maýsym kúni tańerteń Feısbýk áleýmettik jelisindegi óziniń jeke paraqshasynda qala turǵyny Elena Bonomanko habarlaǵan bolatyn.
Onyń aıtýynsha, oqıǵa 8 maýsym kúni saǵat 14:00-de Jandosov kóshesi 36 mekenjaıynda bolǵan.
«Jas jigit jolsyzben júretin kóligimen úıdiń aýlasynda artqa qaraı jyldam qozǵalyp, qart anany qaǵyp ketti. Keıýana aıqaılasa da ol ony estimeı, artqa qaraı júre bergen. Tek temir baǵanaǵa baryp soǵylyp bir-aq toqtaǵan. Áıtpese, áıeldi basyp óter edi. Qart áıeldiń aıtýynsha, jigittiń esimi Robert Pak. Ekinshi qabatta turatyn týystaryna qonaqqa kelgenge uqsaıdy. Óıtkeni, oqıǵadan keıin onyń týystary ájeıge «shý kótermeńiz» dep kelipti. Dárigerdiń aıtýynsha, qart ananyń tiri qalǵany tańqalarlyq jaǵdaı. Onyń 3 qabyrǵasy jáne jambas súıegi synǵan. Júre almaıdy jáne ásirese túnde jaraqaty qatty syzdaıdy», - dep jazǵan bolatyn.
