Almatyda 84 myńnan astam aǵash shirip tur

ALMATY. QazAqparat – Túgendeý men jasyl jelek tizilimine sáıkes Almaty aýmaǵynda 4 mln astam aǵash ósip tur, onyń 84 myńnan astamynyń qulaý qaýpi bar. Ózegi shirigen aǵashtyń 35 myńy kóshe boıynda, 49 myńy aýlalarda. Bul týraly qalalyq ekologııa jáne qorshaǵan orta basqarmasy jasyl qordy basqarý jáne monıtorıng bóliminiń basshysy Nurlan Quttybaev baspasóz týrynda aıtty, dep habarlaıdy QazAqparat tilshisi.

Aıtýynsha, ótken jyly qalada qulaý qaýpi bar aǵashtardy kesýdiń bes jyldyq jospary bekitilgen. Soǵan sáıkes, byltyr magıstraldyq joldar boıynda, saıabaq aımaqtarynda jáne aýlaishilik aýmaqtarda 6 myń shirigen aǵash kesilip, onyń ornyna 68 myń kóshet otyrǵyzyldy.

«Bıyl basqarma 16 925 myń qaýipti aǵashty kesýdi josparlap otyr jáne kesilgen aǵashtardyń ornyna 169 250 myń kóshet otyrǵyzý kózdelgen», - dedi ol.

Búgingi kúni kestege sáıkes jalpy paıdalanymdaǵy jerlerde ósip turǵan qaýipti aǵashtardy kesý jumystary bastaldy. Oǵan 33 brıgada tartyldy, barlyǵy 180-nen astam adam jumys isteıdi. Jumys bastalmas buryn jaqyn mańdaǵy úılerdiń turǵyndary qulaǵdar etilgen. Eskertý belgileri ornatylyp, qajetti qaýipsizdik sharasy saqtalady.

J. Jıembaev atyndaǵy Qazaq ósimdik qorǵaý jáne karantın ǴZI qyzmetkerleri, Botanıka jáne fıtoıntrodýktsııa ınstıtýty jáne ekobelsendiler qaýipti aǵashty muqııat tekseredi.

«Aǵashtyń saý nemese shirigen ekenin kózben kórip anyqtaý árkez múmkin emes. Sondyqtan, aǵashtyń ózeginde nemese tamyrynda shiriktiń bolýyn anyqtaýǵa múmkindik beretin arnaıy qurylǵy-burǵy bar. Qalalardaǵy jasyl keńistiktiń jasy tabıǵatqa qaraǵanda tómen. Óıtkeni, qalada aǵashtar aýyr metaldardy sińiredi jáne ártúrli mehanıkalyq zaqymǵa ushyraıdy. Qatty jel soqqan kezde aýrý aǵashtar qulap, ǵımarattarǵa, qurylystarǵa zııan keltirip, sonymen qatar adam shyǵynyna ákelýi múmkin», - deıdi J. Jıembaev atyndaǵy Qazaq ósimdik qorǵaý jáne karantın ǴZI bıologııalyq qorǵaý bóliminiń meńgerýshisi Nurjan Muhamadıev.