Almatyda 84 myńnan astam aǵash shirigen, qaýipti jaǵdaıda tur
ALMATY. QazAqparat – Almaty qalasynda 2,8 mln jasyl jelek bolsa, 84 myńy jaramsyz, shirip, qulaǵaly tur. Bul týraly qalalyq jasyl ekonomıka basqarma basshysynyń mindetin atqarýshy Serik Ádilbaev aıtty, dep habarlaıdy QazAqparat tilshisi.
«Qalada 2 809 183 aǵash pen buta bar. Onyń ishinde saý aǵash – 1 946 234, kári aǵash – 360 309, jas óskinder – 418 012 jáne qulaǵaly turǵan 84 628 aǵash bar», - dedi basqarma basshysy.
Onyń aıtýynsha, adam ómirine, densaýlyǵyna, múlkine qaýip tóndiretin ózegi shirigen jasyl jelekterdiń basym bóligi qalanyń ortalyǵynda ósip tur. Kóshe boıynda – 34 962, aýlalarda – 49 666 aǵash bar.
«Jyl saıyn aýdandyq ákimdikterge 1,9 myń aǵash kesýge jáne onyń ornyna mindetti túrde 19 myń túp aǵash otyrǵyzý úshin 54 mln teńge bólinedi», - dedi spıker.
Sonymen qatar, ol qaladaǵy barlyq apatty aǵashtardy kesý baǵdarlamasy jasalyp jatqanyn tilge tıek etti.
Ár kesilgen taldyń ornyna 10 kóshetten otyrǵyzylady.
