Almatyda 826 kg sertıfıkattalmaǵan pırotehnıkalyq ónim tárkilendi
ALMATY. QazAqparat – Almatyda polıtsııa qyzmetkerleri 826 kg sertıfıkattalmaǵan pırotehnıkalyq ónim tárkiledi.
Bul týraly qalalyq Tótenshe jaǵdaılar departamenti basshysynyń mindetin atqarýshy Erlan Álibekov onlaın brıfıng barysynda aıtty, dep habarlaıdy QazAqparat tilshisi.
«Jańa jyl merekesi kezinde órt qaýipsizdigin qamtamasyz etý maqsatynda Polıtsııa departamentimen birlesip, pırotehnıkalyq ónimderdi zańsyz satý oryndaryn anyqtaý úshin 2020 jylǵy 15 jeltoqsannan 2021 jylǵy 7 qańtarǵa deıingi aralyqta birlesken sharalar ótkizý Jospary jasalyp, bekitildi. Bul jospardy iske asyrý sheńberinde 40 shara ótkizilip, polıtsııa qyzmetkerleri 826 kg sertıfıkattalmaǵan pırotehnıkalyq ónim tárkiledi.
Polıtsııa qyzmetkerleri QR Ákimshilik quqyq buzýshylyq týraly kodeksiniń 196 babynyń 1-bólimi boıynsha 8 ákimshilik hattama toltyrdy. Qazaqstan Respýblıkasynyń zańnamasynda tyıym salynǵan nemese shektelgen taýarlarmen jáne ózge zattarmen saýda jasaǵany úshin 25 aılyq eseptik kórsetkish boıynsha aıyppul qarastyrylǵan. Turǵyndar arasynda pırotehnıkany durys qoldaný týraly 2000-nan astam jadynama, broshıýra men eskertpe taratyldy», - dedi Erlan Álibekov.
Onyń aıtýynsha, Almaty qalasynda jyl saıyn jańa jyl merekelerinde 10-nan 15-ke deıin órt bolady. Al órttiń 30 paıyzy pırotehnıkalyq buıymdardy qoldaný saldarynan bolǵan. Sońǵy 5 jylda bolǵan 76 órttiń 16-sy pırotehnıkany qoldanýdan boldy.
«Eń aldymen pırotehnıkalyq ónimderdi satyp alǵanda, oramnyń tutastyǵyna jáne onyń jaramdylyq merzimine nazar aýdaryńyz. 14 jasqa deıingi balalarǵa pırotehnıkany óz betimen qoldanýǵa jol bermeńiz. Pırotehnıkany qoldaný kezinde ónimdi ózińizden alystaý ustańyz. Qaýipti aımaq radıýsynda (50 metr) pırotehnıkany ushyrýǵa eshqandaı kedergi (aǵash shoqtary, syzyqtar, otshashýlar baǵytyn ózgerte alatyn elektr jelileri) joq ekenine kóz jetkizińiz. Shyrshalar men olardyń áshekeılerin ornatý kezinde aǵashtar ornyqty negizge ornatylyp, úı-jaıdan shyǵýǵa tosqaýyl bolmaýy kerek, shyrshanyń butaqtary qabyrǵa men tóbeden kem degende 1 metr qashyqtyqta ornalasýy qajet, transformatorsyz elektr jelisin paıdalanǵan kezde kerneýi 12 voltke deıingi shamdardy qoldanyńyz.
Shamdardyń ruqsat etilgen qýaty 25 vattan aspaýy kerek. Eger jaryqtandyrý kezinde aqaý anyqtalsa (symdardyń qyzýy nemese ushqyn shyǵarý), onda gırlıandyny dereý elektr jelisinen ajyratyńyz. Zaqymdanǵan nemese qorǵanysh qasıetterin joǵaltqan, órt týdyrýy múmkin jaramsyz elektr jelilerin paıdalanbańyz», - dedi E.Álibekov.
Onyń aıtýynsha, jasandy jáne tabıǵı shyrshanyń ekeýi de órtenetin materıalǵa jatady.
«Sondyqtan sanıtarlyq normalar men erejege sáıkes olardy ornatýdyń talaptary men qaýipsizdigin ǵana eskerý kerek», - dedi ol.
Almaty Jedel medıtsınalyq járdem qyzmetiniń bas dárigeri Birjan Ospanovtyń aıtýynsha, jańa jyl merekesinde kóbinese adamdar aýrýhanaǵa kúıikpen, synyqpen, ýlanýmen túsedi.
«Byltyr mysaly bizde eń jas kishi patsıent 4 jasta boldy. Ul bala bengal ottarynan kózi kúıik shalyp tústi. Der kezinde aýrýhanaǵa jetkizip, emdedik. Qalada mereke kúnderi 200 brıgada, 600 medıtsına qyzmetkeri jumys isteıdi. Eger oqys jaǵdaı bolsa, mindetti túrde jedel járdem shaqyryńyzdar», - dedi B.Ospanov.
