Almatyda 800 mln teńge turatyn antıkvarıattardy zańsyz tasyǵan top ustaldy
ALMATY, QazAqparat - Almatyǵa zergerlik buıymdar men antıkvarıattardy zańsyz ákelgen uıymdasqan qylmystyq toptyń basshysy 7 jylǵa bas bostandyǵynan aıyryldy, dep habarlaıdy QazAqparat tilshisi.
Almaty qalasynyń Avıatsııalyq kólik prokýratýrasy men Ekonomıkalyq tergeý qyzmeti birlesip, quny 800 mıllıonnan asatyn qundy taýarlardy zańsyz ákelgen qylmystyq toptyń jolyn kesti.
Mekemeniń məlimetinshe, qylmystyq topty A.G.Rogovıkov basqarǵan. Olar bes jyl boıy (2012 jyldan 2017 jylǵa deıin) Qazaqstanǵa zergerlik buıymdar, antıkvarıat jáne sándik óner buıymdaryn jasyryn túrde jetkizip otyrǵan. Sonymen qatar, olar kontrabandalyq zattardy kedendik baqylaýdan jasyryp, jalǵan qujatpen ótkizip júrgen.
«Qylmystyq toptyń zańsyz áreketteri memleketke 60 mln. teńge kóleminde (kedendik tólemder men salyqtardy tólemeý túrinde) shyǵyn keltirdi. Osy fakti boıynsha QR Qylmystyq kodeksiniń 262-babynyń 1-tarmaǵyna sáıkes, uıymdasqan qylmystyq topty qurýǵa baılanysty 234-babynyń 2-tarmaǵynyń 3-bóliginde kózdelgen ekonomıkalyq kontrabandaǵa qatysty aldyn ala tergeý júrgizildi», - dep habarlady Almaty qalasynyń Avıatsııalyq kólik prokýratýrasy.
Qylmystyq toptyń basshysy 7 jylǵa, toptyń eki múshesi 4 jáne 5 jylǵa sottaldy. Al úshinshi múshesi 2 jyl 7 aıǵa bas bostandyǵynan aıyrylyp, múlki tərkilendi.
Sot úkimi kúshine endi. 800 mıllıonnan astam teńgeni quraıtyn kontrabandalyq zattar memlekettik kiriske aýdaryldy.
Tańsholpan Begalyqyzy
