Almatyda 800-den astam jumysshy qar kúreýge shyqty
ALMATY. QazAqparat - Almatyda túnge deıin tolassyz qar jaýǵan. Qala kommýnaldyq qyzmetteriniń habarlaýynsha, qala ishinde qardyń qalyńdyǵy 5 sm, al taýly aımaqtarda 10 santımetrge deıin jetedi, dep habarlaıdy QazAqparat tilshisi Almaty qalasynyń baspasóz qyzmetine silteme jasap.
«Kommýnaldyq qyzmetter qar jaýa bastasymen-aq joldarǵa kóktaıǵaqqa qarsy materıaldardy seýip otyrdy. Jalpy 176 tonna qum sebildi. Joldar men jaıaýjoldardaǵy qardy kúrep, sypyryp otyrdyq, al qalanyń joǵarǵy jaǵyndaǵy qardy tasyp shyǵardyq. 17 naýryz kúni tańerteńgi 08:00-ge deıin 608 tekshe metr qar shyǵaryldy», - delingen ákimdiktiń habarlamasynda.
Túnde 407 tehnıka qoldanylyp, 290 jol jumysshysy jumyldyryldy. Kúndiz 450 arnaýly tehnıka, 820 jumysshy qar kúreýge shyqty.
Qala ákimdigi men aýdandyq ákimdikterde qardyń kúrelýin baqylaý boıynsha táýliktik kezekshilik uıymdastyrylǵan.
