Almatyda 800-den astam jas startapshy óz jobalaryn usyndy
ALMATY. QazAqparat - Almatyda 800-den astam jas startapshynyń qatysýymen ınnovatsııalyq ıdeıalardyń festıval-kórmesi ótýde, dep habarlaıdy QazAqparat tilshisi.
Startapshylar festıvaline 13 pen 32 jas aralyǵyndaǵy jastar qatysyp jatyr. Olar: Qazaqstannyń ár aımaǵy men kórshi memleketterden kelgen stýdentter, oqýshylar jáne jas kásipkerler.
«Sharaǵa qatysýshylardyń barlyǵy baǵdarlama aıasynda jazda bıznes-lagerlerde trenıngterge qatysyp, qosymsha bilim alyp, ózderiniń qabiletterin odan ári damytty. Qazir 40-qa jýyq joba usynyldy. Festıval qorytyndysy boıynsha 15 nomınatsııa boıynsha jeńimpazdardy anyqtaımyz», - dedi uıymdastyrýshylardyń biri Aldııar Seıtahmet.
Festıvaldiń ashylý rásimine qatysqan QR Parlamenti Májilisiniń depýtaty Darhan Myńbaı barlyq startapshylardy quttyqtady.
«Bul festıvaldiń sizderge bereri kóp. Sizderge jańa ıdeıalardy usynady. Men bárińizge sáttilik tileımin. Sizder usynǵan jobalar bizdiń qoǵamymyzǵa qajet bolady dep oılaımyn. Sizderdi kásipkerler men bılik basyndaǵylar ǵana emes, sonymen birge búkil qoǵam qoldaý kerek», - dedi Darhan Myńbaı.
Shara barysynda, Enactus Kazakhstan» prezıdenti, fılosofııa ǵylymdarynyń doktory, QR Prezıdentiniń janyndaǵy Jastar saıasaty jónindegi keńestiń múshesi Albına Erjanova da sóz sóıledi.
«Biz bıznes pen bilim berýdi biriktirip, bolashaq bıznes kóshbasshylaryn qalyptastyramyz. Bizdiń baǵdarlamamyz erekshe, ol jastarǵa senimdilik pen jiger syılaıdy», - dedi ol.
Sharanyń maqsaty men mindeti - daryndy jastardyń múmkindikterin keńeıtý, bıznes-qaýymdastyqtardyń jastar startaptaryn qoldaýǵa qyzyǵýshylyqtaryn arttyrý.
Festıval jeńimpazdary 8 qarashada belgili bolady.
