Almatyda 80 jastaǵy keıýana kúıik shalyp, kóz jumdy
ALMATY. QazAqparat - Almatyda gaz qospasynyń jarylysynan japa shekken 80 jastaǵy keıýana kúıik shalyp kóz jumdy, dep habarlaıdy QazAqparat tilshisi.
Qalalyq Densaýlyq saqtaý basqarmasy habarlaǵandaı, áıeldiń denesiniń 80 paıyzyn kúıik shalǵan. Ol Ortalyq klınıkalyq aýrýhanada esin jımastan kóz jumdy.
Gaz qospasynyń qoparylysynan japa shekken 45 jastaǵy er adamnyń jaǵdaıy týraly dárigerler keıinirek aıtyp bermek.
Aıta ketý kerek, tótenshe jaǵdaı tańǵy 8:00-de Bostandyq aýdanyndaǵy Orbıta-4 shaǵyn aýdany №11 bes qabatty úıde bolǵan.
Qalalyq Jedel járdem stansasynyń baspasóz qyzmeti málimdegendeı, tórtinshi qabattaǵy páterde gaz aýa qospasy qoparylyp, 80 jastaǵy áıeldi kúıik shaldy . Sondaı-aq, tótenshe jaǵdaıdan 45 jastaǵy er adam japa shekti. Ol №4 aýrýhanaǵa jetkizildi. Sondaı-aq, qoparylys saldarynan páterdiń esikteri men terezeleri synyp, jıhazdar búlingen.
