Almatyda 8 jasar oqýshy qalamnyń ishindegi serippeni jutyp qoıdy

ALMATY. QazAqparat - Almatydaǵy №2 balalar qalalyq klınıkalyq aýrýhanasyna qalamnyń ishindegi temir serippeni jutyp qoıǵan oqýshy shuǵyl jaǵdaıda tústi, dep habarlaıdy QazAqparat tilshisi.

№2 qalalyq balalar klınıkalyq aýrýhanasynyń baspasóz qyzmetinen málim etkendeı, 8 jasar bala aýrýhanaǵa túser aldynda 3 saǵat buryn aýzyna salyp shaınap otyrǵan qalamnyń serippesin kúlgen kezde jutyp qoıǵan, ol tynys alý joldaryna túsken.

Biraz ýaqyttan keıin bala jótelge, tynys alýdyń aýyrsynýyna shaǵymdanǵan. Ata-anasy balany №2 balalar qalalyq klınıkalyq aýrýhanasynyń jedel járdem bólimshesine jetkizedi. Balany mamandar tekserip, keýde qýysynyń rentgenografııasyn jasady. Rentgenogrammada oń jaq bronhta bógde zat bar ekeni anyqtaldy. Birden aýrýhanaǵa jatqyzylyp, manıpýlıatsııaǵa daıyndyq jasaldy.

«Jalpy anestezııamen qatań trahebronhoskopııa jasaldy. Oń jaq negizgi bronhtan janama zat (serippe) anyqtaldy. Aıta ketý kerek, negizgi bronhtardaǵy bóten deneni dıagnostıkalaý óte qıyn.

Serippe arnaıy «krokodıl» qystyrǵyshymen alynady», - deıdi №2 balalar qalalyq klınıkalyq aýrýhanasynyń hırýrgııalyq bólimshesiniń meńgerýshisi Marat Qaptaǵaev.

Onyń aıtýynsha, tynys alý joldarynyń bógde deneleri balalyq shaqta jıi kezdesetin patologııa. Kóbinese bundaı jaǵdaı 1-15 jas aralyǵyndaǵy balalar arasynda kezdesedi. Balalarda 70-80% jaǵdaıda bóten deneler traheıa men bronhtarǵa «taıyp», tynys alý joldarynyń ishinara nemese tolyq bitelýine ákeledi.

Basqa jaǵdaılarda bógde zat daýys baılamdarynyń ústinde, jutqynshaq, keńirdek deńgeıinde turyp qalady. Úlken zattar jóteldi, asfıksııany týdyrady, sóıleý fýnktsııasy buzylyp, balanyń ómirine qaýip tóndirýi múmkin.

«Bóten denelerdi alyp tastaǵannan keıin keıbir naýqastarǵa ońaltý sharalaryn jasaý qajet bolady. Al asqynǵan bógde denelerdi alyp tastaǵannan keıin mıkrobqa qarsy preparattardy profılaktıka retinde qoldaný qajet. Boljam kóbinese naýqastyń jasyna baılanysty. Bundaı jaǵdaı náresteler men ómirdiń alǵashqy jyldaryndaǵy balalar úshin óte aýyr. Balaǵa tamaq ishý kezinde sóılesýge, kúlýge, júgirýge ruqsat etpeńiz. Kishkentaı balalarǵa usaq oıynshyqtar men oıynshyq bólshekterin, saǵyzdy aýzyna salýǵa jol bermeńiz», - dep keńes beredi dáriger.

Foto: 2 qalalyq klınıkalyq aýrýhananyń baspasóz qyzmeti