Almatyda 8 jasar qyzdy tonaǵan adam ustaldy
ALMATY. QazAqparat - Almatyda 8 jasar qyzdy tonaǵan kúdikti ustaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, atalǵan qylmysqa qatysty aryz kishkentaı qyzdyń anasynan túsken.
Áıeldiń aıtýynsha, qaladaǵy dárihanalardyń birinde belgisiz er adam onyń kishkentaı qyzynyń qulaǵyndaǵy syrǵasyn sheship alǵan.
«Kúdiktiniń is-áreketi beınebaqylaý kameralaryna túsip qalǵan. Beınejazbadan er adamnyń oqýshy qyzdyń qulaǵyndaǵy syrǵasyn qalaı sheship alyp jatqanyn kórýge bolady. Jedel-izdestirý is-sharalaryn júrgizý barysynda bizdiń bólimsheniń qyzmetkerleri 49 jastaǵy K. esimdi qala turǵynyn ustady. Kúdikti qylmysyn moıyndady», – dedi Áýezov aýdandyq PB janyndaǵy polıtsııa bóliminiń bastyǵy Elnur Qudiretbaev.
Atalǵan derek boıynsha QR QK-niń 191-baby 1-bóligi boıynsha qylmystyq is qozǵaldy.
