Almatyda 8 jańa mektep salynady
ALMATY. QazAqparat - Almatyda bıyl 8 jańa mektep boı kóteredi, dep habarlaıdy QazAqparat tilshisi.
«Almatyda jyl saıyn bilim berý salasyna 100 mlrd teńge bólinedi. Bul 32 myń ustazdyń, tárbıeshilerdiń jalaqysyna baǵyttalady. Sondaı-aq, 221 mektep, 182 balabaqsha, 20 kolledjdiń jumys istep turýyna bólinedi», - dedi qala ákimi Baýyrjan Baıbek.
Sońǵy 3 jylda bıýdjet esebinen 8 myń balaǵa arnap 11 jańa mektep pen 9 balabaqsha salyndy.
«Sonda da mektep pen balabaqshada oryn tapshylyǵy bar. Qala halqy orta eseppen 50 myńǵa ósip keledi. Mektep oqýshylarynyń sany - 10-12 myńǵa, mektepke deıingi jastaǵy balalardyń sany 5-7 myńǵa ósip keledi. Sonyń nátıjesinde kóp mektepte oryn joq», - dedi ákim.
Máselen «Rahat» shaǵyn aýdanyndaǵy mektep 90 oqýshyǵa shaqtalǵan. Qazir onda 500 bala oqyp jatyr. «Trýdovık» shaǵyn aýdanyndaǵy mektep 100 oqýshyǵa arnap ashylǵan. Qazir bul aýdanda mektep jasyndaǵy 900 bala bar. «Darhan» shaǵyn aýdanynda bir de bir mektep joq, biraq 1 800 bala turyp jatyr.
«Osyǵan baılanysty Prezıdent Joldaýy aıasynda 2022 jylǵa deıin 8 úlken mektep salynady. 6 mektep - Alataý aýdanynda, qalǵandary Áýezov jáne Naýryzbaı aýdandarynda salynady. Bul mektepter boıynsha jobalyq qujattama daıyndalyp jatyr. Balabaqshalardan oryn ashý úshin jekemenshik baqshalarǵa memlekettik tapsyrys berilip jatyr. Osynyń arqasynda 4 jylda 539 jekemenshik baqshada 18 myń oryn ashyldy. Búldirshinderdiń 83% paıyzy balabaqshamen qamtyldy. 3,5 myń jumys oryn ashyldy», - dedi Baýyrjan Baıbek.
Sonymen qatar, iri qurylys kompanııalary bıyl 270 oryndyq eki balabaqsha salyp beredi. Osylaısha qalalyq bıýdjetten 3,5 mlrd teńge únemdeldi.
