Almatyda 8 myńnan astam bala 36 sport úıirmesine tegin qatysady

ALMATY. QazAqparat - Almatyda 8 myńnan astam bala 36 úıirmege tegin qatysady. Bul týraly óńirlik kommýnıkatsııalar qyzmetiniń brıfınginde Almaty qalasy sport basqarmasy basshysynyń orynbasary Bekjan Onjan aıtty, dep habarlaıdy QazAqparat tilshisi.

Bekjan Onjannyń aıtýynsha, Almatynyń 8 aýdanynda 100 bos ýaqyt ortalyǵy bar, onda 8 myńnan astam adamdy qamtıtyn tegin túrde 36 sport úıirmesi jumys isteıtinin málimdedi. «Joba maqsaty – 6 jastan 15 jasqa deıingi balalar úshin buqaralyq qoljetimdi sportty damytý, olar keıinnen kásibı sportqa kóshýge múmkindik alady. Atalǵan baǵdarlamaǵa qatysýshylar ishindegi bolashaǵy bar 60-tan astam bala Balalar men jasóspirimder sport mektebine qabyldandy», - dedi basqarma ókili.

Ol Almatyda sporttyń oıyn túrleri boıynsha toǵyz sport klýby qarjylandyrylatynyn jetkizdi. Olardyń ishinde: «Býrevestnık Almaty» voleıbol klýby, «Almaty» qyzdar voleıbol klýby, «Almaty» basketbol klýby, «Aısulý» áıelder hokkeı klýby, «Almaty» hokkeı klýby, «Azııa Sport» QQ regbı klýby, «Almaty» gandbol klýby, «Qaırat» FK, «Qaırat» fýtzal akademııasy bar.

Sonymen birge, Prezıdent Joldaýyn iske asyrý jónindegi Jalpyulttyq jospardy oryndaý maqsatynda kásibı sport klýbtaryn buqaralyq sportqa qaıta bóle otyryp, olardy kútip ustaýǵa qarjy qarastyrylǵan.

Spıker Almaty qalasy men Respýblıka qurama komandalaryna sport rezervin daıyndaý boıynsha sporttyń 78 túrinen 13 myńnan astam sportshy daıyndalyp jatqanyn atap ótti. ıAǵnı, búginde Respýblıkanyń ulttyq quramasyna 906 almatylyq sportshy kiredi. Onyń ishinde, negizgi quram – 135, jastar quramy – 375, jasóspirimder quramy – 396 sportshy.