Almatyda 8 kólik soqtyǵysyp, úsh adam zardap shekti
ALMATY. QazAqparat - Almatyda 8 kólik soqtyǵysyp, úsh adam zardap shekti, dep habarlaıdy QazAqparat tilshisi.
Іri jol-kólik oqıǵasy búgin tańerteńgi ýaqytta boldy. Saıyn men Jandosov kósheleriniń qıylysynda segiz avtokólik soqtyǵysyp, úsh adam japa shekti.
«№7 qalalyq klınıkalyq aýrýhanaǵa 2 naýqas jetkizildi. 1992 jyly týǵan er adamǵa bas jáne bastyń jumsaq tinderiniń jaraqaty dıagnozy qoıyldy. 1976 jyly týǵan áıelge keýde, omyrtqa jaraqaty, oń jaq aıaǵynyń tómengi tusy jáne sol jaq tize býynyndaǵy jumsaq tinderdiń jaraqaty dıagnozy qoıyldy», - dedi qalalyq densaýlyq saqtaý basqarmasy.
Taǵy bir adam Almaty oblysyna qarasty aýrýhanaǵa jetkizildi. Olardyń ómirine qaýip tónip turǵan joq. Dárigerdiń tekserýinen keıin bári ambýlatorııalyq em qabyldaýǵa jiberildi.
