Almatyda 8-qabattan qulaǵan jigit aman qaldy
ALMATY. QazAqparat – Almatylyq dárigerler 8-qabattan qulaǵan azamatqa operatsııa jasap, aman alyp qaldy, dep habarlaıdy QazAqparat tilshisi.
Almaty qalalyq qoǵamdyq densaýlyq saqtaý basqarmasy málimetinshe, 8-qabattan qulaǵan 19 jastaǵy jigit aýrýhananyń qabyldaý bólimine asa aýyr halde jetkizilgen.
Patsıent shuǵyl túrde jansaqtaý bólimine jatqyzyldy.
Dárigerler onyń mıy shaıqalyp, jabyq bas-mı jaraqatyn, birinshi-ekinshi dárejeli travmatıkalyq shok alǵanyn jáne kóp súıekteri synǵanyn anyqtady.
Oǵan mindetti áleýmettik medıtsınalyq saqtandyrý sheńberinde eki ota jasaldy.
Ortalyq qalalyq klınıkalyq aýrýhananyń ortopedııa bólimi meńgerýshisi Qanat Táýekelovtiń aıtýynsha, jansaqtaý qyzmetkerleri aldymen patsıentti jaraqat saldarynan bolǵan shoktan aryltqan.
Eki kún ótken soń dárigerler ota jasaý jóninde sheshim qabyldady.
«Eki kezeńde birneshe operatsııa jasaldy. Birinshi ota «synǵan jambas súıegin ashyq repozıtsııalaý, plastınamen jáne burandalarmen bekitý» dep atalady. Naýqas esin jıyp, jaǵdaıy jaqsarǵan soń ekinshi ota jasaldy. Bul operatsııa barysynda súıek tinderin synǵan jerden bir-birine jalǵap, metall konstrýktsııalardyń kómegimen jalǵadyq», – dedi Qanat Táýekelov.
Onyń sózine sensek, joǵary tehnologııa kómegimen jasalǵan operatsııa asa kúrdeli manıpýlıatsııalar qataryna jatady.
Mundaı ota MÁMS paketi sheńberinde ǵana jasalady.
«Biz patsıentti emdeý barysynda onyń ómirin saqtap qalýdy basty maqsat etip qoıdyq. Sonymen qatar múgedek bolyp qalmaýy úshin barymyzdy saldyq. Nátıjesinde naýqastyń ómirin saqtap qana qoımaı, aıaqqa turǵyzdyq. Aıtý kerek, patsıent operatsııadan soń ekinshi kúni-aq júrip ketti. Ortalyq qalalyq klınıkalyq aýrýhanada reabılıtatsııadan ótti. Búginde aýrýhanadan shyqqan jas jigit óz betinshe júrip-turady», - dedi dáriger.
