Almatyda 8 ınvestıtsııalyq joba júzege asyrylmaq
ALMATY. QazAqparat - Búgin Almatyda qala ákimi Ahmetjan Esimovtyń tóraǵalyǵymen ótken otyrysta mashınajasaý jáne jıhaz salasyndaǵy 10 ınvestıtsııalyq joba qaraldy.
Otyrys barysynda quny 45,5 mlrd. teńge bolatyn 8 joba qabyldanyp, Alataý aýdanynda ornalasqan arnaıy ındýstrıaldy ekonomıkalyq aımaqqa kóshiriletin boldy.
Qala basshysy ótinishterdi qaraý barysynda olardyń birqatar talaptarǵa saı bolýyn qadaǵalaýdy tapsyrdy.
«Qazir ındýstrıaldy aımaqqa engisi keletin kásiporyndar kóp. Birinshi kezekte olar az ýaqyt aralyǵynda óz qýattylyǵyn kórsetýi kerek jáne jańa jumys oryndaryn qalyptastyrýy kerek. Indýstrıaldy aımaqta ornalasqan kásiporyndardyń eksporttyq áleýeti joǵary jáne ımporttyń ornyn basa alatyndaı qýaty bolǵany jón», - dedi qala ákimi A.Esimov.
Qala ákimshiliginiń baspasóz qyzmetinen habarlaǵandaı, atalmysh 8 joba qosymsha 1800 jumys ornyn ashýǵa múmkindik beredi. Qalǵan eki joba qaıta jetildirýge jiberildi.
Esterińizge sala keteıik, byltyr Almatyda farmatsevtıka, jıhaz jasaý, hımııa ónerkásibi, qurylys salalarynda 13 joba qabyldanǵan bolatyn.
