Almatyda 753 bos jatqan jer telimderi anyqtaldy - B.Baıbek
ALMATY. QazAqparat-Almatyda bıyl kásipkerlerdi óndiris alańdarymen qamtamasyz etý maqsatynda jer telimderin jappaı túgendeý sharasy júrgizildi. Sonyń nátıjesi boıynsha barlyǵy 753 bos jatqan jer telimderi anyqtaldy. Olardyń 80 paıyzyna menshik ıeleriniń paıdalanýyna shekteý qoıyldy.
Bul týraly búgin Almatyda Ortalyq kommýnıkatsııa qyzmetiniń fılıalynda Ult jospary - «100 naqty qadamdy» oryndaýda aralyq kezeńde júzege asyrylǵan isterdi qorytyndylaý boıynsha ótken baspasóz máslıhaty barysynda qala ákimi Baýyrjan Baıbek málimdedi.
«Almatyda bos jatqan jer joq» degen sózdi jıi estısiń. Jer joq emes, bar. Biraq, olardy anyqtap, aınalymǵa engizý qajet. Almatyda tipti maqsatsyz qoldanylyp jatqan aýyl sharýashylyq jer telimderi bar. Mundaı jerler aldaǵy ýaqytta májbúrli túrde qala menshigine alynyp, saýdaǵa shyǵarylýy múmkin. Qazir, qalada jalpy aýmaǵy 329 gektar bolatyn 107 jer teliminiń menshik ıelerine eskertý jiberildi. Sondaı-aq, búgingi tańda qalada jalpy aýmaǵy 88 gektar bolatyn, jumysy toqtap turǵan 116 óndiris nysandary anyqtaldy. Mine, sol nysandarda qosymsha ınfraqurylym jasaýǵa aqsha shyǵyndamaı-aq, jańa óndiris kózin ashýǵa bolady. Bul nysandar týraly qosymsha aqparat Almaty ákimdiginiń saıtynda jarııalanatyn bolady», - dedi B. Baıbek.
