Almatyda 75 myńnan astam oqýshyǵa kompıýter kerek
ALMATY. QazAqparat – Almatyda 75 myńnan astam oqýshy men 2 myńnan astam muǵalimge kompıýter jetispeıdi. Bul týraly qalalyq Bilim basqarmasy basshysynyń orynbasary Qaırat Jumanov onlaın brıfıng barysynda málim etti, dep habarlaıdy QazAqparat tilshisi.
«Qashyqtan oqytýǵa balalardyń tehnıkalyq daıyndyǵyn qamtamasyz etý qolǵa alyndy. Osy maqsatta balalardyń jáne muǵalimderdiń kompıýtermen qamtylýyn anyqtaý maqsatynda monıtorıng júrgizildi. Nátıjesinde 75 myńnan astam balanyń jáne 2 myńnan astam muǵalimdi kompıýtermen qamtamasyz etý qajettiligi týyndap otyr. Atalǵan máseleni sheshý qolǵa alyndy»,– deıdi Qaırat Jumanov.
Sonymen qatar, ol qashyqtan oqytý formatynda jumys isteý úshin muǵalimderdiń daıyndyqtan ótkenin jetkizdi.
«2020 jylǵy 5 tamyzdan bastap muǵalimderdiń tsıfrlyq saýattylyǵyn jetildirý jáne olardy Bilimland.kz, Opiq.kz, Kundelik.kz, Microsoft.Teams atty platformalarmen jumys isteýge úıretý boıynsha onlaın kýrstar uıymdastyryldy. Búgingi kúni 15 444 muǵalim oqydy. Sondaı– aq, ınternet jelisimen qamtylmaǵan 22 myńnan astam oqýshyǵa SIM-kartalar beriletin bolady»,– deıdi ol
