Almatyda 73 oıyn mekemeleri jabylyp, 954 oıyn apparattary tárkilendi
ALMATY. 10 naýryz. QazAqparat /Názıra Eleýhan/ - Almatyda zańsyz oıyn bıznesimen kúres jalǵasýda.
Shuǵyl tekseristiń arqasynda sońǵy bir aıdyń ishinde Almaty polıtseıleri 73 oıyn zaldary men jasyryn kazınolardy anyqtap, 954 oıyn apparattaryn, 2,5 mıllıon teńge men úsh myń dollardan astam qarajatty tárkilegen. Bul týraly aqparatty Almaty qalasynyń ІІD-niń baspasóz qyzmeti habarlady.
«Zańsyz oıyn bıznesimen kúres júrgizý úshin qala boıynsha 7 arnaıy top quryldy. Bul jumysqa sonymen qatar, ýchaskelik ınspektorlar, krımınaldyq polıtsııa qyzmetkerleri men polıtsııanyń keshendi kúshi tartyldy. Tekserý reıdteri kúndiz de, túnde de júrgizildi. Sońǵy túnderi bizdiń qyzmetkerler alty jasyryn oıyn mekemelerin japty», - dedi Almaty qalasynyń ІІD-niń Uıymdasqan qylmyspen kúres basqarma bastyǵynyń orynbasary Baqyt Balǵymbaev. Onyń aıtýynsha, kóp jaǵdaıda oıyn zaldary turǵyn úıler aýmaǵynda, aıaldamalarda, saýda úıleri men bazarlarda ornalasqan.
«Birinshi kezekte qylmystyq jaýapkershilikke oıyn zaldarynyń ákimshiligi men kassırleri tartylady. Ustalǵandardyń kópshiligi zańdy bilgen joqpyz dep jaltarýda. Biraq, bárińiz biletindeı olardyń barlyǵy jaýapkershilikten bosatylmaıdy. Zańsyz oıyn bıznesimen kúres jyldyń sońyna deıin jalǵasatyn bolady. Jaqyn arada sot sheshimimen kópshilik, qalyń jurtshylyq aldynda tárkilengen oıyn apparattary joıylatyn bolady. Bul aktsııany biz BAQ, «Nur Otan» HDP-men birge ótkizýdi josparlap otyrmyz», - dedi B. Balǵymbaev.
