Almatyda 725 adamnyń 180 myń dollaryn qaltaǵa basqan alaıaq áıel ustaldy
ALMATY. QazAqparat – Almatyda jaýapkershiligi shekteýli seriktestik dırektory asa iri kólemde alaıaqtyq jasady degen kúdikpen ustaldy, dep habarlaıdy QazAqparat tilshisi.
Almaty qalalyq polıtsııa departamenti málim etkendeı, kúdikti azamatsha bırjalyq saýdamen aınalysatyn jalǵan kompanııalar men saıttar jasaǵan. Qazirgi tańda onyń qylmystyq áreketinen zardap shekken 725 adam anyqtaldy.
«Kúdikti qarjylyq saýatty arttyrý boıynsha semınarlar ótkizip, onda óz aýdıtorııasyn aqshany qazirgi ýaqytta paıdaly aktsııalarda saqtaý kerek dep sendirgen. Ol mundaı áreketimen is júzinde uzaq ýaqyt aınalysqan adam retinde ádemi jáne saýatty aıtqandyqtan, kelýshiler oǵan sengen. Aldanǵan azamattarǵa ol aktsıoner bolýdy jáne bırjalyq saýdalyq aktıvterge ınvestıtsııalaý arqyly aqshalaryn kóbeıtýdi usynǵan. Jospar boıynsha salymshylar salynǵan qarajattan 40% paıda alýy kerek bolatyn. Ideıany júzege asyrýǵa vırtýaldy platforma qajet bolǵan jáne ol úshin «ınvestorlarǵa» logın men parol berilip, elektrondy ámııan tirkelgen «itrade» saıty qoldanylǵan. Olar is júzinde ózderi salǵan qarajattyń jáne alynǵan kiristiń somasyn kórgenimen, bul tek monıtordaǵy sandar ǵana edi. Investıtsııa belsendi «qarjygerdiń» qaltasyna túsken»,- dedi Almaty qalalyq polıtsııa departamenti tergeý basqarmasy bastyǵynyń orynbasary Muhamedáli Seısenuly.
Tergeý barysynda azamattardyń ınvestıtsııa retinde 500-den 30 myń AQSh dollaryna deıin salǵany anyqtaldy.
Salymshylardyń eshqaısysy ýáde etilgen aqshasyn almaǵan.
Qarjylyq saýatty úıretip júrgen azamatsha bastapqyda alynǵan aqshany tóleýdi jáne qaıtarýdy josparlamaǵan.
Muhamedáli Seısenulynyń aıtýynsha, onyń qylmystyq áreketinen 2019 jyldyń qańtarynan bastap jalpy somasy 180 myń AQSh dollarynan astam materıaldyq shyǵyn keltirilgen
«Іs júzinde zardap shekken azamattardyń sany áldeqaıda kóp bolýy, kelgen shyǵyn mólsheri budan da joǵary bolýy yqtımal. Kúdikti saıtta joǵary kiristi paıda tapqysy keletin azamattardy belsendi paıdalanǵan. Qazirgi tańda QR Qylmystyq kodeksiniń 190-babynyń 4-bóliginiń 2-tarmaǵymen sotqa deıingi tergeý júrip jatyr. Buryn osyǵan uqsas qylmystary úshin qylmystyq jaýapkershilikke tartylǵan, 1974 jyly týǵan azamatsha Almaty qalasynyń ýaqytsha ustaý ızolıatoryna qamaldy», – deıdi Muhamedáli Seısenuly.
