Almatyda 71 turǵyn SSSR tólqujatymen júrgen
ALMATY. QazAqparat – Almatyda SSSR-dyń qyzyl pasportymen júrgen 71 turǵynǵa jańa qujat berildi, dep habarlaıdy QazAqparat tilshisi.
Almaty kóshi-qon qyzmetiniń málimetinshe, jyl basynan beri Almaty qalasynda 1974 jylǵy úlgidegi burynǵy SSSR pasporty negizinde 71 adamǵa Qazaqstan Respýblıkasy azamatynyń jeke basyn kýálandyratyn qujat berildi.
«Úkimettiń 2013 jylǵy 26 tamyzdaǵy № 852 qaýlysynyń, «Qazaqstan Respýblıkasy azamatynyń pasportyn, Qazaqstan Respýblıkasy azamatynyń jeke kýáligin, Qazaqstan Respýblıkasynda sheteldiktiń turýǵa yqtııar hatyn, jeke kýálikterin, azamattyǵy joqtar jáne bosqyndardy tirkeý, berý, aýystyrý, tapsyrý, alyp qoıý jáne joıý erejesin bekitý týraly» talaptaryna sáıkes, 1974 jylǵy úlgidegi pasport negizinde alǵash ret jeke kýálik alǵan azamattar Qazaqstan Respýblıkasy azamatynyń jeke basyn kýálandyratyn qujattarǵa, olardyń, Qazaqstan Respýblıkasynyń azamattyǵyna jatatynyn 13-pishin boıynsha Almaty qalalyq PD Kóshi-qon basqarmasy Azamattyq jáne ımmıgratsııa bólimi anyqtama berý arqyly rastaǵannan keıin nemese Qazaqstan Respýblıkasynyń aýmaǵynda týǵandardyń jáne turaqty negizde turatyn azamattarǵa beriledi», – dedi Almaty qalalyq PD kóshi-qon qyzmeti basqarmasynyń bastyǵy Ashat Bútinshinov.
Qujat alǵandardyń arasynda 54 jastaǵy Asylbek Omarbekov te bar. 24 qyrkúıekte ol Qazaqstan Respýblıkasy azamatynyń jeke kýáligin aldy. Er adam densaýlyǵyna baılanysty kórsetilgen qujatty ýaqytynda rásimdeı almaǵan. Sol sebepti, osy ýaqytqa deıin eski qujatpen júrgen.
