Almatyda 700-den astam mas júrgizýshi jazaǵa tartyldy
ALMATY. QazAqparat - Almatyda mas kúıinde rýlge otyrǵan júrgizýshiler kólik basqarý quqyǵynan aıyrylyp, qamaýǵa alynýda, dep habarlaıdy QazAqparat tilshisi.
Jyl basynan beri Almaty qalasynyń mamandandyrylǵan aýdanaralyq ákimshilik sotynyń sheshimine sáıkes, mas kúıinde kólik aıdaǵan 711 júrgizýshi ákimshilik qamaýǵa alyndy. Al onyń 1084-i kólik aıdaý quqyǵynan aıyryldy.
«Búgingi tańda megapolıste apat deńgeıi 41,3% -ǵa azaıdy. Jalpy, Almaty joldarynda 1 486 jol-kólik oqıǵasy tirkelip, saldarynan 46 adam kóz jumyp, taǵy eki myńǵa jýyq adam túrli dene jaraqatyn aldy. Sondaı-aq, jyl basynan beri jol qozǵalysy erejesin buzǵan 546 925 júrgizýshi anyqtaldy. Qazir qalada kólik qozǵalysyn qadaǵalap otyratyn avtomattandyrylǵan 105 post jumys isteıdi. «Sergek» júıesiniń kómegimen 354 083 buzýshylyq tirkeldi, - deıdi Almaty qalasy DP ákimshilik polıtsııa basqarmasynyń bastyǵy Jandos Muratalıev.
