Almatyda 700 ana grant aldy

ALMATY. QazAqparat – Almatyda bıyl «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda 700 ana óz kásibin bastady, dep habarlaıdy QazAqparat tilshisi.

Jańa baǵdarlama týraly áleýmettik jelidegi paraqshasynda qala ákimi Baqytjan Saǵyntaev jazdy.

«Kópbalaly analardy qoldaý úshin birqatar baǵdarlamalar júzege asyrylýda. Ótken jyly barlyq aýdanda kópbalaly jáne az qamtylǵan otbasylaryna arnalǵan «Baqytty otbasy» áleýmettik jobasyn ashtyq. Joba aıasynda áıelderdi iskerlik belsendilikke tartý maqsatynda «Іsker ana» baǵdarlamasy iske asyrylýda. Kýrsta kásipkerliktiń álippesi úıretiledi.

Bıyl «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda kópbalaly jáne az qamtylǵan otbasylardan shyqqan 700-ge jýyq ana óz bıznesin ashyp, bıznes-ıdeıalaryn júzege asyrý úshin 200 AEK-ke deıingi mólsherde grant aldy.

Búginde olar tigin men toqyma buıymdaryn, ulttyq kıim men áshekeılerdi, ydys-aıaqtar jáne basqa da taýarlardy shyǵarady. Bul ónimderin olar Túrksib aýdanynda metsenattardyń qoldaýymen ashylǵan «Іsker ana» arnaıy dúkeninde sata alady», - dedi Baqytjan Saǵyntaev.

Buǵan deıin «Baqytty otbasy» ortalyqtarynyń 30 myńǵa jýyq adamǵa qyzmet kórsetkenin jazǵan bolatynbyz.