Almatyda 70-ke jýyq adamǵa zańsyz jer satqandar sottaldy
ALMATY. QazAqparat - Almatyda 70-ke jýyq adamǵa zańsyz jer satqan qylmystyq top múshelerine sot úkimi shyqty, dep habarlaıdy QazAqparat tilshisi.
Qalalyq Polıtsııa departamentinen málim etkendeı, sot aldynda «Kamenskıı» gaz óńdeý zaýytynyń burynǵy qyzmetkerleri Ý.Mamýtbaev, A.Nurshabaev, S.Kuljabaev jáne K. Jákejanov jaýap berdi.
«Naýryzbaı aýdanynda zańsyz jer saýdasymen aınalysyp kelgen atalmysh qylmystyq top áleýmettik ahýaldy baqylaý kezinde anyqtaldy. Alaıaqtar «Kamenskıı» GÓZ-ge tıesili «10-12 sotyq» jer ýchaskelerin alýǵa qolǵabys etý úshin ózderiniń týystarynan, dostarynan, kórshileri men tanystarynan (70-ke jýyq adam) aqsha qarajattaryn (10 myńnan 15 myń AQSh dollaryna deıin) alyp kelgen. Olar jerlerdi zańdastyrý úshin terrıtorııany jappaı basyp alý aktsııalaryn uıymdastyrǵan. Sondaı-aq túrli qarsylyq sharalaryna ıtermelegen. Nátıjesinde, atalǵan aýmaqta 180 úı zańsyz boı kótergen», - dedi Polıtsııa departamentiniń resmı ókili Saltanat Ázirbek.
Odan bólek, top músheleri memleketik organdardy jerlerdi zańdastyrýdan negizsiz bas tartty dep aıyptap, qoǵam nazaryn ózderine aýdartpaq bolǵan. Birneshe ret qarsylyq aktsııalaryn uıymdastyrǵan. Onymen qosa, zańsyz qurylystardy súrý kezinde top músheleri bılik organdaryna qarsylyq kórsetip, tipti, óz-ózderin jaǵyp jiberýmen qorqytqan.
Naýryzbaı aýdandyq soty Jákejanovty QR QK 190-baby 2-bóliginiń 4-tarmaǵy boıynsha aıypty dep tanyp, 5 jylǵa bas bostandyǵynan aıyrdy. Sonymen qatar sot Jákejanovtan aldanyp qalǵan adamdar paıdasyna 60 mln teńge óndirýdi úkim etti.
Al Mamýtbaev QR QK 190-babynyń 2-bóligimen kináli dep tanylyp, sot ony 2 jylǵa bas bostandyǵyn shekteý týraly úkim etti.
Sonymen qatar, Mamýtbaevtan jábirlenýshi Jumashevtyń paıdasyna materıaldyq shyǵyn retinde 3 mln teńge, sot shyǵyndary úshin 35 655 teńge óndirip alý týraly sheshim shyǵardy.
