Almatyda 7 sport nysany salynyp jatyr
ALMATY. QazAqparat- Almatyda bıýdjet qarjysy esebinen 7 iri sporttyq nysan salynyp jatyr. Bul týraly Almaty qalalyq sport basqarmasynyń basshysy Rústem Baıseıitov málim etti, dep habarlaıdy QazAqparat tilshisi.
Spıkerdiń aıtýynsha, bıyl jabyq sporttyq nysandardyń qurylysy eselengen. Bul obektiler táýligine shamamen 10 myń adamdy qabyldaýǵa jetedi.
Qazirgi ýaqytta Almatyda bıýdjet qarjysy esebinen jeti sporttyq nysanda qurylys-montaj jumystary júrgizilip jatyr, onyń ishinde alty sporttyq-saýyqtyrý kesheni men tennıs ortalyǵy bar.
Sonymen qatar, jekemenshik uıymdar bes iri sport nysanyn salyp jatyr. Atap aıtar bolsaq, ústel tennısi ortalyǵy, Suńqar HShTK dene shynyqtyrý-saýyqtyrý kesheni, «Juldyz» yqshamaýdanyndaǵy sport kesheni, Maı Vın dene shynyqtyrý-saýyqtyrý kesheni, Áýezov aýdanyndaǵy kúres ortalyǵy. «Jan dosym» tennıs ortalyǵy paıdalanýǵa berildi.
2021 jyly aýdandyq ákimdikter dene shynyqtyrý-saýyqtyrý ortalyqtaryn ornalastyrý úshin qosymsha jer telimderin berdi. 14 ýchaskeniń jeteýi qalanyń kommýnaldyq menshiginde, qalǵan jeteýi jekemenshikte.
Qazirgi ýaqytta memlekettik qorda ornalasqan aýdany 0,3-ten 1 ga deıingi jeti ýchaske úshin qala qurylysy jáne ýrbanızm bólimi jobalyq-smetalyq qujattamany ázirleýge konkýrs jarııalady.
Sonymen qatar, Atletıkalyq aýyldyń irgeles aýmaǵynda jabyq jeńil atletıkalyq manej salý josparda. Qazirgi ýaqytta jobalyq-smetalyq qujattamany ázirleýge tender ótkizilip jatyr.
Spıker atap ótkendeı, 2022-2024 jyldarǵa arnalǵan Sport basqarmasy jalpy somasy 3 mıllıard 83 mıllıon teńgege qalanyń sport uıymdaryn qajetti ınventarmen jáne qural-jabdyqtarmen keshendi túrde kezeń-kezeńimen jabdyqtaý josparyn daıyndady.
