Almatyda 7 myń teńge para alǵan HQKO qyzmetkerleri tergelip jatyr
ALMATY. QazAqparat - Kezekti jyldamdatyp bergeni úshin para aldy degen kúdikpen ustalǵan Almatydaǵy mamandandyrylǵan HQKO qyzmetkerine qatysty tergeý júrgizip jatyr, dep habarlaıdy QazAqparat Polıtsııa departamentine silteme jasap.
«Bul kúdikti azamat burynnan bizdiń baqylaýymyzda bolǵan. Kezekti tezdetý úshin ol jeti myń teńge alyp jatqan kezinde ony polıtseıler ustady. Biz osy uıymnyń birqatar qyzmetkerleriniń para alatyndyǵy týraly jedel málimet aldyq. Olar azamattarǵa kezeksiz qyzmet alý múmkindigin usynǵan», - dedi Almaty Polıtsııa departamenti uıymdasqan qylmysqa qarsy kúres basqarmasynyń basshysy Berik Ábilbekov.
Polıtsııa málimeti boıynsha, «kómekshilerdiń» 5 myń men 15 myń teńge arasynda aqy alady eken.
Aqshasynyń bir bóligin avtoortalyqtyń qyzmetkerlerimen qyzmet kórsetý protsesin jyldamdatý úshin bólisedi.
«Bizdiń bólimshe qyzmetkerleriniń dáleldi bazasy uzaq ýaqyt boıy málimet jınaǵan. Ol QR QK 247-baby (zańsyz syıaqy alý) boıynsha Alataý aýdandyq polıtsııa basqarmasynda tergelip jatyr», - dep tolyqtyrdy B. Ábilbekov.
Ustalǵan azamatqa qatysty qylmystyq is qozǵaldy. Materıaldar úsh kún ishinde aýdandyq sotqa jiberiletin bolady.
«Ákimshilik polıtsııa basqarmasy Tirkeý-emtıhan jumystary bóliminiń qyzmetkerleri halyqpen baılanyspaıdy. Olardyń quzyryna kelip túsken materıaldardy alystan qaraý, olardy qylmystyq esepke alý boıynsha tekserý kiredi jáne osynyń barlyǵy tek qana aqparattyq júıede», - dedi Polıtsııa departamentiniń resmı ókili Saltanat Ázirbek.
Polıtsııa sybaılas jemqorlyqty boldyrmaý maqsatynda arnaıy HQKO - daǵy polıtsııa qyzmetkerleriniń kabınetteri ashyq áınekten jasaǵan.
Eske sala ketsek, biz buǵan deıin Almatydaǵy mamandandyrylǵan HQKO-nyń front-ofısiniń eki ınspektory zańsyz aqsha alǵany týraly habarlaǵan bolatynbyz.
