Almatyda 7 mln teńgeniń taýary jaramsyz bolyp qaldy
ALMATY. QazAqparat - Almatyda sanepıdemıologtar ótken jyly quny 7 mln teńge bolatyn jaramsyz taýardy aınalymnan alyp tastady, dep habarlaıdy QazAqparat tilshisi.
«Byltyr barlyǵy 5 mln teńgege synama satyp alyndy. Saraptama nátıjesi boıynsha azyq-túlik taǵamdarynyń 10,4%-y, balalarǵa arnalǵan taýarlardyń 20%-y, jeńil ónerkásip taýarlarynyń 40%-y paıdalanýǵa jaramsyz bolyp shyqty. 63 kásipkerlik sýbektige qatysty ákimshilik is qozǵaldy. 7 mln 265 myń teńge kóleminde aıyppul salyndy. 19 shaǵyn bıznes sýbektisiniń jumysy toqtatyldy. Aınalymnan quny 6705 013 teńge bolatyn 4423,11 kg taýar alynyp tastaldy», - dedi departamenttiń baspasóz qyzmeti.
Naqtylaǵanda, 2613 azyq-túlik synamasy alynsa, onyń 264-i normatıvtik-tehnıkalyq qujattamaǵa sáıkes bolmaǵan.
«Onyń ishinde 12,9%-y otandyq óndirýshilerdiki, 5,7%-y EAEO elderiniń ónimi. 72% taýar markerleý standarttaryna saı emes, 31% - mıkrobıologııalyq kórsetkishter boıynsha qaýipti bolyp shyqty. Kóbine et ónimderi (29,7%), aspazdyq (29,2%), balyq ónimi (28,4%), qus eti ónimderi (23,0%) paıdalanýǵa jaramsyz dep tabyldy. Sút pen sút ónimderinen 211 synama alyndy. 8 synama taza bolmaı shyqty», - dedi departamentten.
