Almatyda 623 úleskerge páter kiltteri tapsyryldy
; ALMATY. 26 jeltoqsan. QazAqparat /Názıra Eleýhan/ - Búgin Almatyda qala ákimi Ahmetjan Esimov «Saıran» mega aýdanyndaǵy «2-kvartal» turǵyn-úı keshenderiniń 623 úleskerine páter kiltterin tapsyrdy.
588 páterli bul keshenniń qurylysy bıylǵy jyly jeltoqsan aıynyń basynda aıaqtalǵan bolatyn. Qurylysty "Global Bıldıng Kontrakt" JShS jobalaý uıymy júrgizdi.
"Aýqymdy jumystardyń arqasynda búgin 623 úleskerdiń máselesi sheshilip otyr. Bıyl Úkimet qaladaǵy qurylysqa jalpy 106 mlrd. teńge bólgen bolatyn, onyń 54 mlrd. teńge somasy osy «Saıran» mega aýdanyndaǵy bul qurylystyń aıaqtalýyna jumsaldy. Ákimshilik óz tarapynan 20 mıllıardqa jumystar jasady, atap aıtqanda bul qarajatqa - 5 shaqyrym jylý, 26 shaqyrym sý júıesi, 46 shaqyrym kárizdik júıe jáne 50 shaqyrym elektr qýaty tartyldy. Osydan úsh jyl buryn úısiz qalǵan 1 604 Qýat úleskerleriniń 981-i úıli bolǵan edi, endi mine qalǵan 623 úleskerine páter berildi. Búgin sonymen "Qýat" degen korporatsııanyń máselesi aıaqtaldy, onyń úleskerleri tolyǵymen úıli boldy",-dep atap ótti Almaty qalasynyń ákimi Ahmetjan Esimov.
2007 jyly Almaty qalasynda 16 201 úlesker bolsa, qazirgi ýaqytta onyń 14 115-niń máselesi sheshildi. Esterińizge sala ketsek, 2007 jyly - 588 úleskerdiń, 2008 jyly - 3 105 úleskerdiń, al, 2009 jyly 4 306 úleskerdiń máselesi sheshilse, 2010 jyly 4 832 úleskerdiń máselesi sheshilip, úıli bolǵan edi.
Bekitilgen jospar boıynsha bıylǵy jyldyń sońyna deıin áli 947 úleskerge páter kiltteri tabystalady dep josparlanýda. Al, qalǵan 1 139 úleskerlerge birqatar obektıvti zańdyq sebepterge baılanysty páter kiltteri 2012 jyly beriledi dep kózdelýde. Osylaısha, kelesi jyly buıyrtsa Almaty qalasynda úleskerlerdiń máselesine núkte qoıylmaq.
