Almatyda 62 otbasy eski baspanadan bes qabatty turǵyn úıge kóshiriledi
ALMATY. QazAqparat – Almatyda ákimniń tapsyrmasymen 62 otbasy eski úıden Túrksib aýdanyndaǵy bes qabatty jańa úılerge kóshiriledi. Bul týraly onlaın brıfıng barysynda Almaty qalasy Túrksib aýdanynyń ákimi Baqytjan Aqjarov málimdedi, dep habarlaıdy QazAqparat tilshisi.
Jaqynda Almaty qalasynyń ákimi «eski» kvartaldardy keshendi qaıta jańartýdy – eski úılerdi buzyp, turǵyndardy jańa úılerge kóshirýdi tapsyrǵan bolatyn. Renovatsııa baǵdarlamasy myńdaǵan qala turǵyndarynyń ómir súrý sapasyn jaqsartýǵa jáne qurylys salasyna ınvestıtsııalar tartýǵa baǵyttalǵan.
Almaty qalasynyń eski turǵyn úı qorynyń jartysy Túrksib aýdanynda ornalasqan. Munda buzylatyn 609 eski úı bar.
«Eski turǵyn úı máselesin sheshý úshin bıyl T.Moldaǵalıev kóshesi men Saýranbaev kóshesiniń qıylysynda 3 bes qabatty turǵyn úı paıdalanýǵa beriledi. Odan ári 3 úıdi buzyp, 7 bes qabatty úı salynady. Sonymen qatar Osıpenko kóshesinde 2 bes qabatty úı salynyp jatyr», - dedi ol.
Sonymen qatar, Kotelnıkov-Kassın kósheleriniń aýdanynda-S.Seıfýllın dańǵyly, «Qazaq Stroy» JShS 2 bes qabatty úıdiń qurylysyn júrgizip jatyr. Bul úılerge 100 eski úı ıesi kóshiriledi.
