Almatyda 62 kınojoba memleketten qarjylandyrylady

ALMATY. QazAqparat- Almatyda 62 kınojoba memleketten qarjylandyrylatyn boldy. Bul týraly brıfıng barysynda Ulttyq kınony qoldaý memlekettik ortalyǵynyń basqarma tóraǵasynyń orynbasary Baýyrjan Shókenov málim etti, dep habarlaıdy QazAqparat tilshisi.

«Ulttyq kınony qoldaý memlekettik ortalyǵy» KEAQ ókiliniń aıtýynsha, otandyq fılmderdi jas rejısserler jıi túsiredi.

«Bıyl Ulttyq kınony qoldaý memlekettik ortalyǵy ótkizgen baıqaý qorytyndysy boıynsha 62 kınojoba qarjylandyrylatyn boldy. 2019 jyly 17 kınojoba, al 2020 jyly 39 fılm qarjylandyrylǵan bolatyn. Bıyl elimizde bir mezgilde 18 tolyq metrajdy, 19 derekti, 17 qysqa metrajdy jáne 8 anımatsııalyq fılmnen turatyn túrli janrdaǵy 60-tan astam kınojoba túsirilmek, bul - buryn-sońdy bolmaǵan kórsetkish»,- deıdi Baýyrjan Shókenov.

Aıtýynsha, bıyl memlekettik qarjylandyrý somasy 5,6 mlrd teńgeden asady.

«Onyń ishinde áleýmettik mańyzy bar fılmderge 4,95 mlrd teńge bólinetin bolsa, 500 mln teńgege jýyǵy «debıýt» sanaty boıynsha ótetin fılmderge, taǵy 129,5 mln teńgesi keń aýdıtorııaǵa arnalǵan fılmderge, 25 mln teńge birlesip shyǵarylǵan fılmderge jumsalady», - dep atap ótti spıker.