Almatyda 61 saýda dúkeni áleýmettik mańyzy bar azyq-túlik baǵasyn negizsiz ósirgen
Almaty qalasy ákiminiń orynbasary Maqsat Qıqymovtyń aıtýynsha, mundaı jumystar 1 773 úı janyndaǵy dúkende júrgizildi.
«Baqytjan Saǵyntaevtyń tapsyrmasyn oryndaı otyryp, qala ákimdigi aýdandyq ákimdiktermen jáne «Nur Otan» partııasynyń ókilderimen birlesip kún saıyn «úı janyndaǵy» 1 773 dúkende ÁMAT baǵasynyń negizsiz ósýine jol bermeý boıynsha monıtorıng júrgizedi, bul jalpy sanynyń jartysyna jýyǵyn quraıdy. Monıtorıng qorytyndysy boıynsha 7 aýdannyń (Túrksib aýdanynan basqa) 61 dúkeninde ÁMAT baǵasynyń negizsiz ósý faktileri anyqtaldy»,- dedi Maqsat Qıqymov.
Onyń aıtýynsha, profılaktıkalyq jumystardyń nátıjesinde azyq-túlik taýarlarynyń kelesi túrleriniń baǵasy tómendedi: kúnbaǵys maıy 15%-ǵa (920-dan 780 tg/l); sút ónimderi 5%-ǵa (aıran 315-ten 300 tg/l, sút 295-ten 280 tg/l); áleýmettik nan 10%-ǵa (100-den 90 tg/l); 1 surypty un 10,2%-ǵa (245-ten 220 tg/kg-ǵa deıin); 6,2% (490-dan 460 tg/ondyqqa deıin); qant 5,7%-ǵa (350-den 330 tg/kg-ǵa deıin).
Qalǵan 1 810 dúkende jumys aǵymdaǵy jyldyń qańtar aıynyń sońyna deıin júrgiziledi, monıtorıng boıynsha jumys turaqty negizde jalǵasady.
Aıta keteıik, Almatyda V, S klasty barlyǵy 3 583 azyq-túlik dúkeni jumys isteıdi: Alataý aýdanynda – 500 dúken, Almaly aýdanynda – 395, Áýezov aýdanynda – 605, Bostandyq aýdanynda – 488, Jetisý aýdanynda – 400, Medeý aýdanynda – 325, Naýryzbaı aýdanynda – 350, Túrksib aýdanynda – 525 dúken.
