Almatyda 600 jańa avtobýs satyp alynady

ALMATY. QazAqparat- Almatyda bıyl 600 avtobýs satyp alý josparda. Bul týraly Erbolat Dosaev Alataý aýdany turǵyndarymen kezdesý barysynda málim etti, dep habarlaıdy QazAqparat tilshisi.

Onyń 200-i Alataý aýdanyndaǵy 19 marshrýtty jańartýǵa baǵyttalady.

Erbolat Dosaevtyń sózinshe, budan bólek jeke tasymaldaýshylar osy jyldyń tórtinshi toqsanyna deıin 73 avtobýs satyp alady. Olar 7 marshrýttaǵy (№18, 19, 46, 98, 99, 109, 122) jańartýdy josparlap otyr.

«Bizdiń aldyńǵy kezdesýlerimizde sizderdiń ótinishterińizdiń deni keıbir marshrýttardyń qolaısyzdyǵy men josparlanǵan qozǵalys aralyǵynyń saqtalmaýy sııaqty qoǵamdyq kólik jumysynyń sapasyna qatysty boldy. Sondyqtan biz bul máselelerdi sheship jatyrmyz», - dedi ákim.

Qala basshysy 2022 jyly ákimdik 450 jańa avtobýs satyp alǵanyn, onyń 92-si (20%) Alataý aýdanyna berilgenin atap ótti.