Almatyda 60-shy ret ótkizilgen velosherýge 1,5 myńnan asa adam qatysty

Tańǵy saǵat 08:00-de Respýblıka alańynan jolǵa shyqqan olar, Jeltoqsan kóshesi boıymen ál-Farabı dańǵylyna kóterilip, odan batysqa qaraı júrip otyryp, QR Tuńǵysh Prezıdenti saıabaǵynyń aldynda máre syzyǵynan ótti.

Búgingi velosherýge qatysqan Almaty ákiminiń orynbasary Záýresh Amanjolova qala turǵyndaryna búgingi is-sharaǵa qatysqandary úshin alǵysyn bildirdi.

«Búgingi velosherýge qatysqandaryńyz úshin sizderge óz atymnan jáne Almaty qalasynyń ákimi Ahmetjan Esimovtiń atynan shyn júrekten alǵysymdy bildiremin. Búgingi sporttyq ıgi shara Almaty qalasynyń ózine jáne salamatty ómir saltyn nasıhattaýǵa baǵyttalyp otyr. Almaty - birtindep sporttyq qalaǵa aınalyp keledi. Qalamyzda búginde velosıped tebýshiler sany, jalpy salamatty ómir saltyn ustanýshylar qatary kún sanap arta túsýde. Bul qýanarlyq jaǵdaı. Endi árbir almatylyq azamat aldaǵy 2017 jyly ótetin Ýnıversıadaǵa qoldaý kórsetýge jáne salamatty ómir saltyn nasıhattaýǵa kúsh salady degen senimdemin», - dedi Z. Amanjolova.

Uıymdastyrýshylar jazǵy demalys merziminde velosherýge 1,5 myńnan asa adamnyń qatysýy az emes ekendigin jetkizdi.

«Jalpy, velosherýler 2009 jyldan beri ótkizilip keledi. Arnaıy jospar boıynsha jylyna 14-15 velosherý uıymdastyrylady. Endi 2009 jyldan beri sanasaq, kúni búginge deıin velosherýlerge 178-180 myńdaı adam qatysypty. Alǵashqy sharaǵa 300-deı ǵana adam atsalysqan bolsa, qazirgi velosherýlerge 3000 myńnan 6000 myńǵa deıin adam qatysady. Qazir jaz mezgili, stýdentter úılerine tarap ketti, al almatylyqtardyń kóbisi basqa óńirlerde demalysta júr. Sonyń ózinde búgingi sharada 1,5 myńnan asa adam boldy, bul az emes», - dedi óz sózinde Almaty q. Dene shynyqtyrý jáne sport basqarmasy basshysynyń orynbasary Naızabek Saǵymbaev.

Jalpy velosıped tebýmen aınalysý densaýlyqqa paıdaly ǵana emes, ýaqytty tıimdi paıdalanýǵa da tıgizer septigi zor. Bul týraly velosherýge belsendi qatysýshylardyń biri, №16-shy qalalyq emhananyń dáriger-hırýrgy Erkebulan Arǵynbaev óz pikirimen bólisti.

«Men alǵash ret velosherýge bıyl sáýir aıynda qatystym. Sodan beri úzbeı qatysyp kelemin. Velosıped tebýdiń densaýlyqqa tıgizer paıdasy óte zor. Ózińdi qashanda sergek sezinip júresiń. Sharshamaısyń. Al bul, ýaqytyńdy tıimdi paıdalanýǵa septigin tıgizedi. Men velosherýge qatysqaly beri salamatty ómir saltyn ustanýǵa myqtap den qoıyp, endi tipti aptasyna bir ret dostarymyzben fýtbol oınap turatyn boldyq», - dedi E. Arǵynbaev.

Búgingi velosherýdiń sońynda uıymdastyrýshylar tarapynan «Eń belsendi ot basy», «Velosport úmiti» atalymdary boıynsha jeńimpazdarǵa jáne belgili velosaıahatshy 70 jastaǵy Túgelbek Qasymulyna baǵaly syılyqtar tabys etildi.