Almatyda 6 zaýyt salynady

ALMATY. QazAqparat - Áleýmettik, ınjenerlik, jol-kólik ınfraqurylymynyń belsendi damýynyń arqasynda jańa shaǵynaýdandar tartymdy bola bastady. Bul týraly «Jańa Almatyny» damytýdyń 2020-2024 jyldarǵa arnalǵan keshendi josparyn iske asyrýǵa arnalǵan dóńgelek ústel otyrysynda aıtyldy, dep habarlaıdy QazAqparat tilshisi.

Saraptamalyq talqylaý barysynda qalalyq Strategııa jáne bıýdjet basqarmasynyń basshysy Almas Batanov shet elderde bıznesti damytý «Jańa Almatyny» damytýdyń keshendi josparynyń baǵyttarynyń biri ekenin atap ótti.

«Alty zaýyt pen alty saýda úıiniń qurylysy qarastyrylǵan. Barlyq nysandar boıynsha jaqsy dınamıka baıqalady, bul nysandar merziminde tapsyrylady. Osylaısha, alty ónerkásiptik kásiporynnyń beseýi iske qosyldy», - dedi Almas Batanov.

«Jańa Almatyny» damytý keshendi josparyn júzege asyrý aıasynda ótken jyly quny 28 mlrd teńge bolatyn avtokólik quraldaryn shyǵaratyn zaýyt iske qosyldy.

Sondaı-aq metall óńdeý jáne jyljymaly qorshaý konstrýktsııalary men avtomatty qaqpalardy óndiretin kásiporyn paıdalanýǵa berildi.

Qaǵaz súlgiler men maılyqtar shyǵaratyn jańa tsehtyń qurylysy da aıaqtaldy.

Sonymen qatar, Almas Batanov sút zaýytyn jańǵyrtý aıasynda ónim assortımentin keńeıtý jáne tuzdyqtar, maıonezder men ketchýpter óndirý, ósimdik maıyn quıý boıynsha keshen salý úshin qosymsha jabdyq satyp alynǵanyn jetkizdi.

Kásiporynnyń qýattylyǵy jylyna 10 myń tonnadan 30 myń tonnaǵa deıin artady.

Jyl sońyna deıin medıtsınalyq maqsattaǵy dıagnostıkalyq testilerdi óndirý zaýytyn iske qosý kózdelgen.

Qazirgi kezde iske qosý-jóndeý jumystary, elektr jetkizý, jabdyqty ornatý júrgizilýde.

Qalanyń ónerkásiptik áleýetin damytý bızneske tıisti ınjenerlik ınfraqurylymy bar jer ýchaskeleri beriletin Indýstrııalyq aımaqty damytýmen tyǵyz baılanysty.