Almatyda 6 myńnan astam aǵash otyrǵyzylady
ALMATY. QazAqparat - Jalpyqalalyq «Jasyl Meken» aktsııasy barysynda demalys kúnderi Almatynyń barlyq segiz aýdanynda 6 myńnan astam aǵash otyrǵyzylmaq, dep habarlaıdy QazAqparat tilshisi.
Bul aktsııany «Jasyl ekonomıka» basqarmasy uıymdastyrady.
Kóktemniń sońyna deıin qala basshylyǵy 12 myńnan astam aǵash otyrǵyzýdy josparlap otyr.
Sonymen qatar, demalys kúnderi qalanyń barlyq aýdandarynda kósheler, aýla aımaqtary, kópshilik oryndar, ózen arnalary men jaǵalaýlary tazalanady.
Buǵan deıin «Jasyl meken» aktsııasy barysynda Ál-Farabı dańǵylynyń boıyndaǵy bólý jolaqtaryna 800 japyraqty jáne qylqan japyraqty aǵash otyrǵyzylǵan edi.
1975 jyldyń sáýirinen bastap munda 30-ǵa jýyq aǵash túrleri otyrǵyzylǵan bolatyn, solardyń tek úsheýi - talshyn, qaraǵaı jáne shyrsha tamyr jaıdy. Sondyqtan osy aǵash túrlerin ǵana otyrǵyzý jóninde sheshim qabyldandy.
Almaty qalasynyń «Jasyl ekonomıka» basqarmasy barlyq almatylyqtardy jalpyqalalyq «Jasyl Meken» aktsııasyna qatysýǵa jáne óz aýlalarynda aǵash otyrǵyzýǵa shaqyrady.
