Almatyda 6 balany órtten aman alyp qalǵan sportshy marapattaldy
ALMATY. QazAqparat – Almaty qalasy ákimi Baqytjan Saǵyntaev belgili kásibı sportshy Dáýren Rymqulovqa «Eńbegi úshin» tósbelgisin tapsyrdy, dep habarlaıdy QazAqpart tilshisi.
«Eńbegi úshin» tósbelgisin tapsyrdym. Kireberisin tútin sharpyǵan úıden alty adamdy shyǵarýǵa kómektesken kásibı sportshynyń bul áreketi qurmetke laıyq. Qıyn jaǵdaıǵa tap bolǵan adamdarǵa kómektesip, batyldyq tanytqandar belsendi azamattyq ustanymdy, qoǵam aldyndaǵy boryshyn kórsetedi. Almatylyqtar senimen maqtanady, Dáýren!», -dep jazdy ákim Instagram paraqshasynda.
Buǵan deıin Dáýren Rymqulov QR Іshki ister mınıstri Erlan Turǵymbaevtyń buıryǵymen «Órtte kórsetken qaısarlyǵy úshin» medalimen marapattalǵan bolatyn.
Esterińizge sala keteıik, 14 tamyz keshki saǵat 21:33-te Almaly aýdany Radostovets kóshesi №49 úıde órt shyqty. Órt sóndirý brıgadasy oqıǵa ornyna kelgende bes qabatty turǵyn úıdiń úshinshi qabatyndaǵy páterdiń as bólmesi ashyq jalynmen janyp jatty.
Óz ómirin qaterge tikken Dáýren qutqarýshylar kelgenge deıin páterde qalǵan 6 adamdy qutqardy .
