Almatyda 6 adamdy órtten qutqarǵan polıtseı marapattaldy
ALMATY. QazAqparat - Almatyda 6 adamdy órtten qutqarǵan polıtseıge memlekettik marapat berildi, dep habarlaıdy QazAqparat tilshisi.
QR Prezıdentiniń jarlyǵymen Polıtsııa departamentiniń kóshi-qon qyzmeti basqarmasynyń kishi ınspektory Ádilet Álimqydyr III dárejeli «Aıbyn» ordenimen marapattaldy.
Tártip saqshysyna marapatty Almaty polıtsııa departamentiniń basshysy Serik Kúdebaev tabystady.
Ádilet Álimqydyr Almatyda jekemenshik úı órtengende, úıdiń turǵyndaryn syrtqa alyp shyqqan bolatyn.
«Men ishki ister organdaryna endi ǵana keldim. Bul marapat men úshin úlken mártebe. Qoǵamdyq tártipti saqtaýǵa yntamdy arttyra túsetini sózsiz. Almaty polıtsııasy qatarynda óz isine berilgen azamattar kóp», - dedi ınspektor.
Aıta ketý kerek, Polıtsııa basqarmasynyń Metropolıten patrýldik polıtsııasynyń serjanty Ádilet Álimqydyr tótenshe oryn alǵan kúni kezekshilikte bolǵan. Jerasty ótkelinde óz ýchaskesin kúzetip júrgen polıtsııa qyzmetkeri úı órtenip jatyr degen habardy estigen soń kóp oılanbastan otqa oranǵan úıge jetedi. Ol úıge kirip kelgende jerde es-tússiz jatqan er adamdy kórip, ony kóterip, syrtqa alyp shyǵady.
Keıin anyqtalǵandaı, qutqarylǵan adam mas kúıinde uıyqtap jatqan. Úı 4 bólikke bólingen, onyń ekeýinde áli de adamdar bolǵan. Polıtsııa qyzmetkeri ýaqytyn joǵaltpastan úıdiń úshinshi bóligine júgirip baryp, ájesi men eki nemeresin alyp shyǵady. Kelesi turǵyndarǵa barǵan kezde esigi jabyq bolady. Biraq serjant ishinde adamnyń bar-joǵyn bilmese de, esik-terezesin qatty ura bastaıdy. Uıyqtap jatqan eki áıel úıdiń shatyry janyp jatqanynan da habarsyz bolyp shyqty.
