Almatyda 590 oryndyq mektep salynyp jatyr
ALMATY. QazAqparat- Almaty ákimi Baqytjan Saǵyntaev Túrksib aýdanynda salynyp jatqan áleýmettik nysandar men joldardyń qurylys qarqynymen, shaǵyn jáne orta bıznestiń damýymen jáne qoǵamdyq keńistikterdi abattandyrýmen tanysty, dep habarlaıdy QazAqparat tilshisi.
Seıfýllın dańǵylynda jeke ınvestıtsııa esebinen 590 oryndy mektep salynyp jatyr.
Zamanaýı standarttarǵa saı jalpy bilim mekemesi jańa oqý jylyna daıyn bolady.
Jaqyn jerde «Shuǵyla» kınoteatry bar, onyń ıesi megapolıs ákimin aýmaqty rekonstrýktsııalaý jáne abattandyrý jobasymen tanystyrdy.
Baqytjan Saǵyntaev munda aýdan turǵyndary úshin jańa ári tartymdy demalatyn oryn bolatynyna nazar aýdardy.
Qala ákimi 300 orynǵa arnalǵan №170 mekteptiń jańa korpýsynyń qurylys barysyn tekserdi. Qoldanystaǵy ǵımaratty jóndeý josparlanǵan.
Salynyp jatqan jeke jáne qalalyq mektepterdi qosa eseptegende Túrksib aýdanynda oqýshy ornynyń tapshylyǵy aıtarlyqtaı tómendeıdi.
Biraq, qala ákiminiń tapsyrmasy boıynsha halyqtyń ósýin eskere otyryp, jańa bilim berý mekemelerine jobalar ázirleý qajet.
Qala bıznesmenderi sporttyq ınfraqurylymdy damytýǵa atsalysyp jatyr. «Juldyz-1» shaǵyn aýdanynda jekpe-jek, kórkem gımnastıka, jattyǵý, trenajer zaldary, toptyq fıtnes aımaqtary, 25 metrlik basseıni bar kópfýnktsıonaldy sport kesheni salynýda.
Qala basshysy keshendi keńeıtý josparlarymen tanysty jáne shetki shaǵyn aýdandarda osyndaı yqsham deneshynyqtyrý-saýyqtyrý ortalyqtaryn salý qajettiligine nazar aýdardy.
«Juldyz» jańa demalys ortalyǵyn aralap kórgen soń qala ákimi osyndaı jobany barlyq aýdandarda júzege asyrýdy tapsyrdy.
Munda jumys sporttyq, mádenı-aǵartýdy damytý baǵyttarynda júrýde. 100-ge jýyq bala ústel tennısi, shahmat jáne doıby, toǵyz qumalaq, beıneleý óneri, kúres, bı jáne mýzyka úıirmelerine qatysýda.
Aýdan ákimderiniń aldyna qoıylǵan basty mindetterdiń biri ShOB damytý jáne jumys oryndaryn qurý.
Sonymen qatar, Baqytjan Saǵyntaev «Inter mýltı servıs» gofrokarton zaýytynda boldy. Munda karton shyǵaratyn jańa jelini tolyq iske qosýǵa daıyndyq júrip jatyr.
Óndiris qýaty boıynsha jylyna shamamen 2,3 myń tonna ónim shyǵarylady.
Zaýytta 140 adam jumys isteıdi, jańa óndiristik jeli iske qosylǵannan keıin 30 jańa jumys orny ashylady.
Almaty ákimi B. Saǵyntaevty VIVA Pharm farmatsevtıkalyq zaýytynda óndiristik tsıklmen jáne shyǵarylatyn dári-dármekterdiń assortımentimen tanystyrdy.
Zaýytta 157 jumys orny qurylǵan.Ótken jyldyń qorytyndysy boıynsha óndiris kólemi 48 ataýly 2 mıllıonǵa jýyq qaptalǵan dáriler preparattaryn óndirdi.
Ózbekstan men Qyrǵyzstanǵa ónimdi eksporttaý jolǵa qoıylǵan, endi reseılik naryqqa shyǵý josparlanýda.
«Alataý» ITP AEA aýmaǵynda dári-dármek shyǵaratyn jańa zaýyt salý jónindegi ınvestıtsııalyq jobany iske asyrý josparlanýda.
Qala ákimi «Qaırat» shaǵyn aýdanyndaǵy jol qurylysynyń sapasy men qarqynyn tekserdi.
Shaǵynaýdannyń 78 kóshesinde sýmen jabdyqtaý jáne sý burýdyń ınjenerlik jelileri tartylǵan. Kóshelerdi daıyndaý jáne asfalttaý jumystary júrýde.
Megapolıs ákimi aýdannyń qoǵamdyq keńistikterin abattandyrý jobalarymen de tanysty.
№32 mekteptiń artynda «Bıýdjetke qatysý» jobasy aıasynda balalar jáne fýtbol alańdaryn, streetball, workout alańdaryn salýǵa daıyndyq bastaldy.
Munda syrtqy jaryq ornatylyp, qoqys jáshikteri, oryndyqtartar qoıylady. Aýmaq kógaldandyrylady.
Sondaı-aq, «Bıýdjetke qatysý» boıynsha Aısha Bıbi, 357 kóshesiniń boıyndaǵy qaraýsyz jatqan jerde sport alańynyń qurylysy bastaldy.
Munda múmkindikteri shekteýli balalarǵa arnalǵan oıyn alańy, júgirý joly, fýtbol alańy, vorkaýt alańy jasalady. Aýmaq kógaldandyrylady ári abattandyrylady.
«Altaı-1» shaǵyn aýdanynda birneshe aýlany biriktiretin aralyq jaıaý júrginshiler aımaǵynyń qurylysy bastalady.
Jobada qalalyqtardyń demalatyn oryndary, balalardyń oıyn keshenderi men sport alańdary, syrtqy jaryq jelilerin ornatý, trotýar joldary jáne aýmaqty kógaldandyrý kórinis tapqan.
