Almatyda 545 túlek «Altyn belgige» úmitker
ALMATY. QazAqparat – Bıyl Almatyda 545 túlek «Altyn belgi» alýy múmkin, dep habarlaıdy QazAqparat tilshisi.
«Bıylǵy oqý jylynda Almaty qalasynyń mektepterin 9299 túlek támamdaıdy. Onyń ishinde 545 oqýshy «Altyn belgiden» úmitti. Bıyl 9 jáne 11-synyp oqýshylary úshin qorytyndy attestattaý júrgizilmeıdi. Attestat bıylǵy oqý jylynyń baǵalary negizinde qoıylady»,– dedi Almaty qalalyq Bilim basqarmasynyń basshysy Lázzat Jylqybaeva onlaın-brıfıng barysynda.
Sonymen qatar, ol 6 sáýirden bastap qazirgi ýaqytqa deıin 276 myńnan astam oqýshy jáne 66 myńnan astam kolledj stýdenti qashyqtan oqyp jatqanyn jetkizdi.
«Jergilikti bıýdjetten bólingen qarjylandyrý jáne demeýshilerdiń arqasynda barlyq oqýshy men 18 myńnan asa oqytýshy 100 paıyz kompıýtermen, ınternet jelisimen qamtamasyz etildi»,– dep atap ótti basqarma basshysy.
Buǵan deıin, L.Jylqybaeva megopolıs oqýshylary jazǵy demalysty qalaı ótkizetinin aıtqan bolatyn. Sondaı-aq túlekter úshin qymbat kólik jaldaýǵa, aqsha jınaýǵa jáne merekelik keshter uıymdastyrýǵa tyıym salynǵany aıtyldy. Bıyl Almatyda 9 myńnan asa túlek UBT tapsyrady.
