Almatyda 54 mln teńgeni jymqyrmaq bolǵan Kamerýn azamattaryna qatysty sot úkimi shyqty
ALMATY. QazAqparat - Almatyda jalǵan aqsha jasaımyz dep halyqty aldaǵan Kamerýn azamattaryna qatysty sot úkimi shyqty. Bul týraly qalalyq sottyń baspasóz hatshysy Qýandyq Eshimet aıtty.
Olar Qazaqstan Respýblıkasynyń azamattaryna ózderin kásipker-týrıster retinde tanystyryp aldaý arqyly senimge kirip, bóten múlikti urlaý maqsatynda ózara qylmystyq top qurdy dep aıyptalǵan bolatyn.
«Sot Ngýný Tepong Oný Pafe men Nangý Ngýný Krıstıan Semplısti QR QK 24-177 4, «b» tarmaǵy boıynsha (asa iri kólemdegi aldaý men senimine kirý arqyly bógdeniń zatyn urlaý) aıypty dep taýyp, árqaısysyn 6 jylǵa bas bostandyqtarynan aıyrý týraly sheshim shyǵardy», - dedi Q.Eshimet.
Esterińizge sala keteıik, qalada jalǵan aqsha jasaýshylar paıda boldy degen aqparat qarjy polıtsııasynyń qulaǵyna jetken. Osy sybysty tekserý barysynda Qarjy polıtsııasy qyzmetkerleri jalǵan 100 dollarlyq qaǵaz aqsha basamyz dep qala turǵyndarynyń senimine kirgen Kamerýn azamattaryn ustady. Olardyń qylmystyq shemasy ózgeshe bolǵan.
«Alaıaqtar aq paraqty shyn aqshamen bettestirip, ıisi jaǵymsyz suıyq eritindini quıady. Ol suıyqtyqtyń adamnyń aqyl-oıyna, oılaý qabiletine keri áseri bar eken. Kelgen adamdar basy aýyryp shyǵyp ketkende, olar ákelgen aqshany alyp taıyp turatyn bolǵan», - dedi Jaqsylyq Jaqybaev.
Júrgizilgen jedel-izdestirý jumystarynyń arqasynda olar qyzmeti úshin 300 myń AQSh dollaryn, ıaǵnı 54 mln teńgeni jymqyrmaq bolǵan kezde qolǵa tústi.
Atalǵan azamattardyń jaldap otyrǵan páterinen aq jáne qara tústi qaǵazdar qıyndysy, eritindi jáne ózge de quraldar anyqtalǵan.
