Almatyda 54 mln teńgeni jymqyrmaq bolǵan Kamerýn azamattary ustaldy
ALMATY. QazAqparat - Almatyda jalǵan aqsha jasaımyz dep halyqty aldaǵan Kamerýn azamattary ustaldy. Bul týraly qalalyq Ekonomıkalyq qylmysqa jáne sybaılas jemqorlyqqa qarsy kúres departamentiniń baspasóz qyzmetiniń jetekshisi Jaqsylyq Jaqybaev aıtty.
Baspasóz qyzmeti jetekshisiniń aıtýynsha, qalada jalǵan aqsha jasaýshylar paıda boldy degen aqparat qarjy polıtsııasynyń qulaǵyna jetken. Osy sybysty tekserý barysynda Qarjy polıtsııasy qyzmetkerleri jalǵan 100 dollarlyq qaǵaz aqsha basamyz dep qala turǵyndarynyń senimine kirgen Kamerýn azamattaryn ustady. Olardyń qylmystyq shemasy ózgeshe bolǵan.
«Alaıaqtar aq paraqty shyn aqshamen bettestirip, ıisi jaǵymsyz suıyq eritindini quıady. Ol suıyqtyqtyń adamnyń aqyl-oıyna, oılaý qabiletine keri áseri bar eken. Kelgen adamdar basy aýyryp shyǵyp ketkende, olar ákelgen aqshany alyp taıyp turatyn bolǵan», - dedi Jaqsylyq Jaqybaev.
Júrgizilgen jedel-izdestirý jumystarynyń arqasynda olar qyzmeti úshin 300 myń AQSh dollaryn, ıaǵnı 54 mln teńgeni jymqyrmaq bolǵan kezde qolǵa tústi.
Atalǵan azamattardyń jaldap otyrǵan páterinen aq jáne qara tústi qaǵazdar qıyndysy, eritindi jáne ózge de quraldar anyqtalǵan. Bul eritindi qazir saraptamaǵa jiberildi.
Qazirgi tańda Almaty qalalyq qarjy polıtsııasynyń tergeý basqarmasymen QR QK 24-177 4, «b» tarmaǵy boıynsha (asa iri kólemdegi aldaý men senimine kirý arqyly bógdeniń zatyn urlaý) qylmystyq is qozǵaldy.
«Osyǵan baılanysty ustalǵandarǵa aldanyp, japa shekken azamattar bolsa, qarjy polıtsııasynyń «144» senim telefonyna bolmasa EQSJD kezekshi bólimine (278-73-00) habarlasýlaryn suraımyz», - dedi Ekonomıkalyq qylmysqa jáne sybaılas jemqorlyqqa qarsykúres departamentiniń baspasóz qyzmetiniń jetekshisi Jaqsylyq Jaqybaev.
